Turk seriallari orasida alohida o‘rin egallagan “Muhtasham yuz yil” loyihasi nafaqat tarixiy syujeti, balki unda ishtirok etgan aktyor va aktirsalar jamoasi bilan ham tomoshabinlarda katta taassurot qoldirgan. Ayniqsa, saroy kanizaklarini gavdalantirgan ayollar obrazi ko‘plab muhokamalarga sabab bo‘lgan. Serialda Xurram sultonning dushmanlari rolini ijro etgan aktrisalar hozir qanday ko‘rinishda va nimalar bilan band?
Nozanin
Serialda sulton Sulaymonning qalbidan joy topa olgan so‘nggi kanizak bu Nozanin edi. U hatto sultonga qiz farzand ham tuhfa etadi. Biroq kanizak va uning bolasining taqdiri achinarli kechgan.
Aktrisa Almeda Abazi serialda Valeriya obrazini gavdalantirgan, u keyinchalik haramga tushgach, ismi Nozaninga o‘zgartirilgan. Almeda — turk-alban modeli va aktrisasi. “Muhtasham yuz yil” uning filmografiyasidagi oxirgi loyiha bo‘lgan. U “Miss Tirana” va “Miss Albaniya” unvonlariga ega bo‘lgan. 2017-yilda u aktyor Tolgaxon Sayishman bilan turmush quradi va Almeda aktrisalik faoliyatiga nuqta qo‘yadi. 2019-yil may oyida o‘g‘il, 2021 yil iyun oyida esa qiz farzand dunyoga keltiradi.
Hozirda Almeda Abazi butun e’tiborini onalik vazifasiga qaratgan. U kino yoki modellik sohasiga qaytishni rejalashtirmayapti. Uzoq vaqt davomida muxlislar uning aktyorlikni tark etishiga erining rashki sabab deb o‘ylashgan. Biroq Almeda va Tolgaxon bu mish-mishlarni inkor etishgan. Abazi bu qarorni o‘zi ongli ravishda qabul qilganini aytgan.
Fotima
Fotima — shahzoda Mustafo haramidagi kanizaklardan biri bo‘lgan. “Muhtasham yuz yil” serialida Fotima xotun obrazi eng salbiy xarakterlardan biri sifatida esda qolgan. U saroyga kelgan ilk kunidanoq Mohidavron tarafini olib, boshqa kanizaklar, xususan, Xurramga qarshi kurashga kirishgan. Fotimaning fe’l-atvori o‘ta qattiqqo‘l, rahmsiz va manfaatparast edi — u o‘z maqsadiga yetishish uchun hech narsadan tap tortmasdi. Aynan shu xususiyatlari tufayli ko‘plab tomoshabinlar uni tashqi ko‘rinishidan ko‘ra ichki dunyosi uchun yoqtirmagan.
Bu obrazni turk aktrisasi Gonja Sariyildiz gavdalantirgan. Serial efirga chiqqach, tomoshabinlar uni real hayotda ham salbiy qahramon deb o‘ylab, ijtimoiy tarmoqlarda salbiy fikrlar bildirgan. Biroq Gonja aktrisalik faoliyatini davom ettirdi va keyinchalik “Sevadi — sevmaydi”, “Mening shirin yolg‘onim” kabi loyihalarda suratga tushdi. Shaxsiy hayotini ommaga oshkor qilmaydigan aktrisa hozirda ham kino sohasida faoliyat yuritmoqda.
Elif
Elif shahzoda Mustafoning birinchi kanizagi bo‘lgan. Ammo uning baxti uzoqqa cho‘zilmaydi. Mohidavron uni Xurramga qarshi kurashishda vositachi sifatida foydalanadi. Fotimaning fitnasi tufayli Elif o‘g‘rilikda ayblanadi va butun haram ko‘z o‘ngida u joniga qasd qiladi.
Bu obrazni turk aktrisasi Go‘zde Chigaji ijro etgan. Vaqt o‘tib, aktrisa ancha o‘zgarib ketgan. Ba’zi muxlislar uni o‘z yoshiga nisbatan ancha katta ko‘rinadi deb hisoblashadi. Shunga qaramay, Go‘zde doimiy ravishda yangi rollarga takliflar olib turadi. U “Bolqon allasi”, “Bir oila tarixi”, “Qora yurak” kabi filmlarda ishtirok etgan.
Izabella
Izabella Kastiliya sultonning haramiga tushib qolishini va uni yurakdan sevib qolishini xayoliga ham keltirmagan edi. Dastlab Sulton uni siyosiy o‘yinning bir bo‘lagi deb biladi, ammo tez orada Izabella ayol sifatida ham qiziqish uyg‘otadi. Roksalana esa, albatta, sultonni chet ellik ayol bilan bo‘lishishni istamas edi.
Izabella rolini Melike Ipek Yalova ijro etgan. Bu uning ilk roli bo‘lgan va uni tasodifan olgan. Melike — diplomatning qizi bo‘lib, ilgari to‘ylar tashkilotchisi bo‘lib ishlagan. Ammo suratga olish jarayoni unga yoqib qolgan va u kino sohasida faoliyatini davom ettirishga qaror qilgan. U “Kara amaki”, “Hayot qo‘shig‘i”, “Bir vaqtlar Chukurovada”, “Aybsiz ayblanuvchi” kabi filmlarda rol o‘ynagan. Hozirda turmushdan ajrashgan.
Yelena
Yelena ham shahzoda Mustafoning kanizaklaridan biri, ammo boshqalardan farqli ravishda u ozod ayol bo‘lgan. Uni ko‘rganda Mustafo o‘zini tanishtirmagan. Uzoq tanaffusdan so‘ng shahzoda Yelenaning majburan turmushga berilishidan xabardor bo‘ladi. U qizning oilaviy qarzlarini to‘laydi va Yelenani haramga olib keladi. Faqat shunda Yelena tanishgan erkak aslida Mustafo ekanini bilib qoladi. Biroq haramda ozod qizning paydo bo‘lishi hech kimga yoqmaydi. Sulton bu ishni eshitib g‘azablanadi. Mustafo uni nikohiga olishni xohlasa-da, yakunda Yelena haramni tark etib, uyiga qaytadi.
Yelena obrazini Jemre Ebuziya gavdalantirgan. Bu aktrisaning ilk loyihasi emas edi. Uning otasi aktyor, bobosi taniqli rejissyor bo‘lgan. Jemre faol tarzda kino olamida ish olib boradi. “Agar chin dildan sevsang”, “Opalar”, “Qizil Istanbul” kabi filmlarda rol o‘ynagan. Shaxsiy hayoti haqida ma’lumotlarni ochiqlashni yoqtirmaydi.
Feruza
Feruza sulton Sulaymonning eng sevimli kanizaklaridan biri va Xurramning eng kuchli raqibi bo‘lgan. Agar tatuirovka voqeasi bo‘lmaganida edi, Roksalana hali ko‘p vaqt unga qarshi kurashishiga to‘g‘ri kelardi. Ko‘pchilik tomoshabinlar Feruzani aynan uning cholkasi va umuman soch turmagi tufayli xunuk aktrisa, deb atashgan.
Bu obrazni Jansu Dere ijro etgan. “Muhtasham yuz yil” aktrisaning ilk loyihasi bo‘lmasa-da, aynan shu rol unga dunyo miqyosidagi mashhurlikni olib kelgan. Aktrisa hali ham kinolarda faol suratga tushmoqda.
Mehriniso
Mustafo haramidagi so‘nggi kanizak, keyinchalik uning yagona rafiqasiga aylangan Mehriniso Barbarossaning qizi bo‘lgan va shahzodaga voris — o‘g‘il tug‘ib bergan. Ushbu obrazni aktrisa Berrak Tuzunatach ijro etgan. U model bo‘lib ham faoliyat yuritadi. Tuzunatach “Tikuvchi”, “Biz shundaymiz”, “Tub”, “Fi, Chi, Pi” kabi loyihalarda rol o‘ynagan. U turli reklama roliklarida ham suratga tushgan.
Izoh (0)