Kambag‘allikni qisqartirish va bandlik vazirligi tomonidan bajarilgan ishlarda ko‘plab kamchilik va muammolar aniqlangan. Bu haqda 6-may kuni o‘tkazilgan parlament yig‘ilishida deputat Anvar Temirov maʼlum qildi.
Yig‘ilishida Anvar Temirov vazirlik hisobotini ko‘rib chiqqani, unda bajarilgan ishlarda kamchiliklar ko‘pligi haqida gapirdi.
“Vazirlikning asosiy funksiyasi aholini ish bilan band qilish, kambag‘allikdan olib chiqish bo‘ladi. Hisobotda keltirilgan raqamlar buning aksini ko‘rsatyapti. Kasb- hunarga o‘rgatadigan mono-markazlarda o‘qitilgan fuqarolarning 74 ming nafarga yaqini (30 foizi) ish bilan taʼminlanmasdan qolgan. Bundan tashqari, byudjet mablag‘lari samarasiz maqsadlarga sarflangan. Aholi o‘qitilyapti-yu, lekin ish bilan taʼminlamay qolyapti yoki bo‘lmasa kerakli kasbga o‘rgatilmayapti. Buning eng qiziq joyi shundaki, baʼzi tumanlardagi markazlar rejani to‘ldirish bilan band. Aksincha, bular kasbga o‘rgatish va ish bilan taʼminlashni maqsad qilishi kerak. Reja to‘ldirish uchun davlat byudjetidan pul sarflamaslik zarur. Nega vazirlik o‘zining eng quyi qatlamigacha islohotni to‘liq yetkazib bormagan? Vazirlik reja to‘ldirish bilan ovora bo‘lsa, ertaga aholi oldida davlat rahbari olib borayotgan islohotlariga teskari yondashuv bo‘lib qolishidan qo‘rqmaydimi? Nega shuncha ajratilayotgan mablag‘lardan samarasiz foydalanildi, nima uchun shu kungacha buning oldi olmadi? Ertaga deputatlar hududlarga chiqsa, fuqarolar oldida javobgarligimiz bor, ular savol berganda javob berishimiz kerak”, dedi deputat.
Bunga javoban, Bandlik vaziri o‘rinbosari Sirojiddin Boboqulov qaysi kasblarga o‘qitilganlar ishga joylashmay qolib ketganini tushuntirdi.
“2024-yil 4-oktyabrdagi prezident qaroriga asosan vazirlik huzuridagi kasbiy ko‘nikma maktablari soni 75 tadan 65 taga muvofiqlashtirildi. O‘tkazilgan tahlillar natijasida 2022, 2023-yillar va 2024-yilning dastlabki olti oyida kasb-hunarga o‘qitilganlarning 30 foizi bandligi taʼminlanmay qolgan. Ularning asosiy qismini oshpazlik, qandolatchilik va tikuvchilik kasblariga o‘qitilganlar tashkil qiladi. Ishga joylashmaganlarning aksariyati xotin-qizlar bo‘lgan. Ular orasida turmushga chiqib ko‘chib ketganlar, uyda bola parvarishi bilan bandlari, olingan ko‘nikmalarni daromad keltiruvchi ishlarga emas, balki o‘z oilasi uchun tatbiq qilganlari aniqlandi. Bugungi kunga qadar vazirlik tizimida o‘qitish jarayoni yangilandi. Oila uchun tatbiq qilinadigan kasblar rejali o‘quv dasturidan chiqarildi. Ushbu yo‘nalishlarga faqatgina ish beruvchi talabiga asosan, yaʼni ish joyi aniq bo‘lgandan so‘ng o‘qitish boshlanadi”, dedi vazir o‘rinbosari.
Avvalroq Bandlik vazirligi 2024-yilda O‘zbekistondagi ish jarayonlarida 868 ta baxtsiz hodisa yuz berganini maʼlum qilgandi. Oqibatda jami 976 kishi jarohatlangan. Shundan 261 kishi halok bo‘lgan, 685 nafari og‘ir tan jarohati olgan, 30 nafari yengil jabrlangan.
Izoh (0)