Hande Erchel, Maryam Uzerli, Afra Sarachog‘lu va boshqa turk yulduzlari hozirda tanishtirishga muhtoj emas, ammo bir necha yil avval ular bosh rollarga loyiq ekanliklarini isbotlashlari kerak edi. Quyida ularning muvaffaqiyat yo‘lidagi boshlanish nuqtasi bo‘lgan loyihalar haqida so‘z boradi.
Hande Erchel
“Qalbim eshigini qoq” romantik komediyasidagi gul do‘koni sotuvchisi Eda obrazi Hande Erchelga faqat jahon miqyosidagi shuhratnigina emas, balki manfaatli reklama shartnomalarini ham keltirdi. Handening mashhurlik sari yo‘li Ozarbayjondagi go‘zallik tanlovidan boshlangan, u yerda 2012-yilda ikkinchi o‘rinni egallagan. Ammo bir yil o‘tib, tanlovga yana qaytib, Erchel g‘olib bo‘lgan.
Aktrisaning ijodiy faoliyatidagi birinchi bosqichi sifatida “Choliqushi” serialini aytish mumkin. Erchel bosh rolda o‘ynamagan bo‘lsa-da, ammo yosh go‘zalni rejissyor Sadullah Jelen ko‘rib qolgan va uni “Gunesh qizlari” ko‘p qismli loyihasiga taklif qilgan, u yerda Hande Selin obrazini yaratgan. Aynan shu obraz uni mashhur qilgan. Ko‘p o‘tmay, aktrisaga “Malikam endi qara” serialida rol o‘ynash taklif qilingan va bu uning faoliyatida katta yutuq bo‘lgan.
Maryam Uzerli
Aktrisa Maryam Uzerli shifokor yoki politsiya xodimi bo‘lishi mumkin edi — bu uning bolalik orzulari edi. Lekin teatr sahnasiga chiqqandan keyin, Maryam aktyorlik kasbini tanladi. Uzerli kinodagi ilk qadamlarini Germaniyada “Inga Lindshtrem” filmi va “Ana endi balet” harbiy dramasida o‘ynab boshlagan. O‘zining chindan ham bor mahoratini ko‘rsata olgan “Qaytishsiz sayohat” filmida, maxfiy agent rolini o‘ynagan. Ammo Maryam tajribali hamkasblari bilan raqobatlasha olmagan, shuning uchun uning faoliyatida tanaffus davri boshlangan. Burilish nuqtasi do‘stining qo‘ng‘irog‘i bo‘lgan, u Maryamga “Muhtasham yuz yil” kastingi haqida gapirib bergan. Aktrisa hech ikkilanmasdan chemodanini yig‘ib, ertasigayoq Turkiyaga uchib kelgan. Tilni bilmaslik to‘siq bo‘lmagan — aksincha, Roksolana roliga kastinglarda uning lahjasi ayni muddao bo‘lgan.
Afra Sarachog‘lu
“Qo‘rg‘on sirlari” yulduzi Afra Sarachog‘lu hali maktabda o‘qiyotgandayoq modellik agentliklari bilan hamkorlik qilgan. Kino olamiga kirib kelishga uning onasi yordam bergan, u “Ikkinchi imkoniyat” melodramasi kastingi haqidagi eʼlonlarni ko‘rib qolgan. Chichek roli Afra uchun kino sanoatiga eshik ochib bergan. Afra uchun chindan ham yutuqli loyiha “Fazilat xonim va qizlari” ko‘p qismli dramasi bo‘lgan, u yerda Sarachog‘lu o‘z oilasini moliyaviy qiyinchiliklardan qutqarish uchun boy insonga turmushga chiqishi kerak bo‘lgan qiz obrazini yaratadi. Bu rol uchun aktrisa “Oltin kapalak” televizion mukofotini olgan.
O‘zge Gurel
O‘zge Gurelning muvaffaqiyat hikoyasi ertakka o‘xshaydi. Kelajakdagi yulduz yangi loyiha haqida tasodifan bilib qolgan va omadini sinab ko‘rishga qaror qilgan. Yuzlab daʼvogarlar orasida aynan uni “Qizim qayerda?” melodramasida bosh rolga tanlaganlar. O‘zge biznesmenning yo‘qolgan qizi obrazini yaratgan. Tajriba va maxsus taʼlimning yo‘qligiga qaramay, uning debyuti g‘alabali bo‘lgan. Gurel muvaffaqiyatini “Muhtasham yuz yil” mashhur serialining so‘nggi mavsumida mustahkamlagan, u yerda u shahzodaning hayotiga kirib kelgan qiz rolini o‘ynagan. Shuningdek tomoshabinlar aktrisani “Olcha mavsumi” taʼsirli melodramasi orqali yaxshi ko‘rib qolishgan. Unda O‘zge orzumand talaba rolini ajoyib tarzda ijro etgan.
Elchin Sangu
Mallasoch Elchin Sangu aktrisalik yo‘lini teatr sahnasidan boshlagan va “Qimmatli vaqt” serialidagi debyuti chindan ham yutuqli bo‘lgan. Keyin “Muhabbat qanday o‘lchamda bo‘ladi?” ko‘p qismli komediyasida va “Bir muhabbat hikoyasi” to‘liq metrajli dramasida rollar ijro etgan. Ammo shundan keyin aktrisaning faoliyatida tanaffus davri boshlangan. Teleekranlarga qaytishga Sangu “Ijaraga olingan muhabbat” romantik komediyasida ishtirok etish orqali muvaffaq bo‘lgan. Ushbu filmda Elchin g‘amxo‘rligida singli va ukasi bor ofitsiant qiz rolini ijro etgan.
Birche Akalay
Bolaligida Birche Akalay xoreografiya bilan shug‘ullangan, lekin 16 yoshida olgan jarohati uning raqsni davom ettirish bo‘yicha rejasini qayta ko‘rib chiqishga majbur qilgan va Akalay sport yangiliklari bo‘yicha boshlovchi bo‘lgan. Birche kino sohasidagi ilk tajribasini 2007-yilda “Taqdir” melodramasida kichik rol o‘ynab olgan. Vatanida Akalay “Samoviy muhabbat” ko‘p qismli dramasiga ko‘ra shuhrat qozongan. Xalqaro miqyosda esa “Qora-oq muhabbat” seriali orqali tanilgan, unda u Asli ismli shifokor rolini o‘ynagan. Birchega filmda Ibrohim Chelikkol hamrohlik qilgan.
Izoh (0)