Bu ayollarning ekrandagi nafis harakatlari, ideal tashqi ko‘rinishi va jilmayishlariga aslo aldanib qolmang, chunki ular turli jang san’atini mukammal egallagan. Kimdir boks bilan stressdan xalos bo‘ladi, boshqasi taekvondo bilan shug‘ullanadi, yana biri esa jangovar rollarni dublyorsiz ijro etadi. Qisqasi, bu ayollar nozik jins vakillari haqidagi mavjud tasavvurlaringizni butunlay o‘zgartirib yuboradi.
Sara Mishel Gellar va taekvondo
Vampirlar bilan kurashgan “Baffi” roli bilan tanilgan Sara, aslida aktyorlikdan oldin taekvondodan qora belbog‘ga ega bo‘lgan. To‘rt yoshida kino sohasida faoliyatini boshlagan bo‘lsa-da, sport uning hayotida doim eng muhim o‘rin tutgan.
Sara figurali uchish, gimnastika bilan shug‘ullangan, keyin esa jang san’atlariga qiziqa boshlagan. U kikboksing, boks, ko‘cha jangi va taekvondo bilan shug‘ullangan. Aynan taekvondo bo‘yicha amaliy bilimlar unga “Baffi” serialidagi jang sahnalarini dublyorsiz bajarishga yordam bergan.
Gellarning hayotiy shiori: “Agar biror narsani istasang — erish, hayot bir marta beriladi va ikkinchi imkoniyat bo‘lmaydi.” Shuning uchun ham u aktrisalik va jang san’atlarini uyg‘unlashtirib, har ikkala yo‘nalishda ham katta yutuqlarga erishgan.
Gal Gadot va jangovar ko‘nikmalar
Gal Gadotning ikki yil Isroil armiyasida xizmat qilgani sir emas. U aynan shu yerda turli jang san’atlarini o‘rgangan, xususan, milliy mudofaa texnikasi bo‘lgan krav-maga uslubini to‘liq egallagan.
Oradan yillar o‘tib, “Mo‘jizakor ayol” filmidagi roli uchun u jangovar mashg‘ulotlarga qaytdi. Boks, jiu-jitsu, kung-fu va kikboksing — bularning barchasini o‘rgandi. Galning o‘zi aytganidek, bunday mashg‘ulotlar unga doimo zavq bag‘ishlaydi:
“Men jang qilishni va qo‘l jangi bilan shug‘ullanishni juda yoqtiraman”, deydi aktrisa.
Gal uchun sport hayotining ajralmas qismidir. U ekrandan tashqarida ham uch nafar qizning onasi bo‘lgan mo‘jizakor ayol bo‘lib qolaveradi.
Dua Lipa va boks
Dua Lipaning ko‘p bora boks bilan uzoq yillardan beri shug‘ullanayotganini aytib o‘tgan. Xonanda turli sport turlarini sinab ko‘rishni yoqtirsa-da, boks uning hayotida mustahkam o‘rin olgan. Bo‘sh vaqti paydo bo‘lishi bilan Dua mashg‘ulotlarga shoshiladi.
Lipaning so‘zlariga ko‘ra, boks butun tana uchun ajoyib mashq bo‘lishi bilan birga, ruhiy salomatlikni ham mustahkamlashda yordam beradi:
“Boks menga ichimdagi g‘ubor va jahlni chiqarish, stressdan xalos bo‘lish imkonini beradi. Boks bilan shug‘ullana boshlaganimdan beri men o‘zimni eng yaxshi jismoniy holatda his qilmoqdaman”, deydi u.
Madonna va karate
66 yoshga yetsa ham mashhur pop-yulduz Madonna har kuni bir necha soat vaqtini sport mashg‘ulotlariga ajratadi. Hozirda xonanda asosan yoga bilan shug‘ullanib kelayotgan bo‘lsa-da, bir necha yil avval u karate bilan jiddiy shug‘ullangan.
Ushbu sport turini tanlashiga Madonnaning sobiq turmush o‘rtog‘i — kinorejissyor va karate bo‘yicha qora belbog‘ egasi Gay Richi ilhomlantirgan. Xonanda Londonning Budokwai Club nomli jang san’atlari institutidagi mashg‘ulotlarga qatnagan va ko‘p vaqtini shaxsiy treninglarga bag‘ishlagan. Qora belbog‘ni qo‘lga kirita olmagan bo‘lsa-da, u o‘z ko‘nikmalarini mukammallashtirgan.
Izoh (0)