Bugungi seriallar to‘plamining barchasi tarixiy janrda bo‘lib, yorqin voqealarga boy ushbu loyihalar Turkiya o‘tmishini o‘rganishga yordam beradi.
“Ertug‘rul” (2014-2019)
“Ertug‘rul” — prodyuser Mehmet Bozdag‘ tomonidan yaratilgan tarixiy sarguzasht teleserial. Undagi voqealar musulmon o‘g‘uz turklari tarixiga asoslangan bo‘lib, XIII asrga tegishli davr haqida hikoya qilinadi. Voqealar markazida Usmonlilar imperiyasining asoschisi Usmon I ning otasi Ertug‘rul Bey hayoti turadi. Tarixiy serialni suratga olish ishlari Turkiyaning Alanya, Beykoz va Nevshehir shaharlarida olib borilgan. Serial 2014-yil 10-dekabrda Turkiyaning TRT 1 telekanalida namoyish etilgan.
“Hukmdor Usmon” (2019-hozirga qadar)
“Hukmdor Usmon” tarixiy jangovar turk seriali ham Mehmet Bozdag‘ tomonidan suratga olingan bo‘lib, “Ertug‘rul” ning davomiy qismi hisoblanadi. Serial syujeti Ertug‘rulning o‘g‘li Usmon G‘oziyning mustaqillik uchun Saljuqiylar saltanatiga qarshi qanday kurashgani haqida hikoya qiladi. Imperiya yaratish uchun Usmon ichki dushmanlarni mag‘lub etishi, so‘ngra kuchli Mo‘g‘ul va Vizantiya imperiyalari bilan to‘qnashuvga kirishishi kerak bo‘ladi.
“Alp Arslon: Buyuk saljuqiy” (2021)
Rejissyor Sedat Inji va prodyuser Emre Konuk tomonidan suratga olingan mazkur tarixiy serial Alp Arslonning Saljuqiylar imperiyasining sultoni sifatida hukmronlik qilgan davrda sodir bo‘lgan siyosiy voqealar va urushlar haqida hikoya qiladi. Serialda bosh rolni ko‘pchilikka “Ijaraga olingan sevgi” melodramasi bilan tanilgan Barish Arduch ijro etgan.
“Qalbim sultoni” (2018)
2018-yilda suratga olingan tarixiy melodrama janridagi ko‘p qismli badiiy film Rossiya va Turkiya kinematograflari hamkorligida suratga olingan. Unda Rossiya imperiyasi amaldorining qizi Anna elchixonada o‘qituvchi bo‘lib ishlaydi. Sulton Mahmud xalq orasiga ketayotib, unga duch keladi va qizning aql-zakovati va bilimiga qoyil qoladi. U Annani saroyga o‘z farzandlariga o‘qituvchi bo‘lib ishlashga taklif qiladi. Vaqt o‘tib ular bir-biriga ko‘ngil qo‘yadi.
“Afsona” (2021-2022)
“Afsona” seriali XIII asrda turklar islomni qabul qilgan davrdagi O‘rta Osiyoda bo‘lgan voqealarga asoslangan. Oqqiz O‘rta Osiyoning tog‘li hududlarida yashaydi. U otasini o‘ldirgan Alpag‘u Xonning aybi bilan erta yetim qoladi. Shu sababli qiz o‘zini boqish, himoya qilishni o‘rganish uchun erta ulg‘ayishga majbur bo‘ladi va Oqqiz dushmanlariga qarshi turishga qodir yosh jangchi aylanadi. U bolaligida xondan o‘ch olishga o‘ziga va’da beradi va uning boyligini o‘g‘irlab, kambag‘allarga tarqatadi. Ammo qizning hayoti eng ashaddiy dushmanining o‘g‘li bilan uchrashganda tubdan o‘zgarib ketadi.
Izoh (1)
Afsona seryali qachon chiqadi