Turk seriallaridagi go‘zal aktrisalar o‘zining mahoratli ijrosi bilan birga, go‘zal va maftunkor ko‘rinishi bilan tomoshabinlarni hayratda qoldiradi. Garchi ular to‘xtovsiz ish rejimi, stress va oilaviy muammolar bilan band bo‘lishsa-da, o‘zlarini doimo yaxshi formada saqlashni biladi. Bugungi maqoladagi turk kinosi yulduzlarining ozish va sog‘lom turmush tarziga oid qoidalari ko‘plab ayollar uchun ilhom manbayi bo‘lishi mumkin.
Hande Erchel
“Qalbim eshigini qoq” seriali yulduzi Hande Erchelning asosiy qoidalaridan biri — qat’iy kun tartibiga amal qilishdir. Aktrisaning ish vaqti doim farq qilsa-da, baribir yetarlicha uxlash va dam olish uchun vaqt topishga harakat qiladi.
Hande ertalab kunini dolchinli suv bilan boshlaydi, bunday ichimlik tetiklik beradi. Onasining vafotidan keyin Hande qattiq stressga tushdi: u juda kam ovqatlanib, haddan tashqari ko‘p mashq qilishi natijasida juda ozib ketdi.
Aktrisa kuniga 6 mahal oz-ozdan ovqatlanish, tamaddi uchun olma iste’mol qilish, shirinlik, yog‘li va unli mahsulotlardan voz kechish, olma sirkasi qo‘shilgan suv yoki limonli suv ichish kabi odatlarga amal qila boshladi. Ammo sport mashg‘ulotlari bilan yanada ko‘proq shug‘ullana boshlagan Hande anoreksiya kasalligiga xos tarzda ozib ketdi. Hozirda uning muxlislari aktrisani bunday qilishdan qaytarmoqda, aks holda Erchel suratga olish jarayonlari uchun kuch topa olmay qolishi mumkin.
Fahriye Evjen
Burak O‘zchivitning rafiqasi Fahriye Evjen birinchi farzandini dunyoga keltirgandan so‘ng vazn orttirdi. Aktrisa avvalgi qomatini qaytarishiga unga bulgur yormasi yordam berdi. U eng foydali yormalardan biri sanaladi, chunki bulgur maxsus ishlov berilgan bug‘doyning glikemik indeksi past bo‘ladi. Bu esa qondagi qand miqdorining keskin ko‘tarilib, yog‘ sifatida zaxira bo‘lib qolishiga yo‘l qo‘ymaydi. Fahriye o‘z ratsionini aynan shu don mahsuloti asosida tuzdi.
Ba’zan aktrisa bulgur o‘rniga suli yormasi iste’mol qildi, unga yog‘siz go‘sht, yogurt, sabzavot va mevalarni qo‘shish mumkin.
Elchin Afajan
“Qalbim eshigini qoq” seriali yulduzi Elchin Afajan “Bir oila tarixi” serialidagi roli uchun semirishi lozim bo‘ldi. loyiha nihoyasiga yetgach, aktrisa avvalgi qomatini qaytarishiga bir necha yil kerak bo‘ldi. U ratsionidan shakar, uglevodlar va glyutenli mahsulotlarni butunlay chiqarib tashladi. Elchin har kuni 10 ming qadam yurishni o‘ziga qoida qilib oldi.
Aktrisa so‘zlariga ko‘ra, ortiqcha vazndan xalos bo‘lish jarayonida mutaxassis nazorati muhimdir. Shuningdek, har bir odamning metabolizmi va organizmi turlicha bo‘lgani uchun diyetolog va murabbiylar tavsiyalariga amal qilish kerak, deb hisoblaydi.
Pelin Karaxan
“Muhtasham yuz yil” serialida sulton Sulaymonning yagona qizi — Mehrimoh obrazini gavdalantirgan aktrisa Pelin Karaxan farzandli bo‘lgach, qisqa vaqtda vazn orttirdi. Avvaliga u o‘zining ortiqcha vaznidan aslo uyalmasligini aytgan bo‘lsa-da, keyinchalik o‘z ustida ishlashga va qomatini tiklashga qaror qildi. Aktrisa ratsionidan yog‘li, shirin va unli mahsulotlarni olib tashladi va oqsilga boy mahsulotlarni, meva va sabzavotlarni ko‘proq iste’mol qildi. Shuningdek, u kundalik suv ichish tartibiga doimo rioya qildi hamda jismoniy mashg‘ulotlar bilan faol shug‘ullandi.
Aslida Pelin jiddiy va murakkab parhezlarni yoqtirmaydi. U eski vaznini qaytarish uchun kaloriya defitsitiga e’tibor qaratdi va sport bilan shug‘ullandi. Natijada aktrisa 35 kilogramm vazndan xalos bo‘ldi.
Maryam Uzerli
Latofatli aktrisa “Muhtasham yuz yil” serialidagi Xurram roli uchun 13 kilogramm vazn yig‘di, keyinchalik homiladorlikdan so‘ng yana semirdi. So‘ng ozish uchun o‘zining shaxsiy ovqatlanish tamoyillarini ishlab chiqdi: Uzerli tabiiy yo‘l bilan yetishtirilgan mahsulotlar, qaynatilgan mol go‘shti, yasmiq, grechka va bulgur kabi mahsulotlarni ko‘proq iste’mol qildi.
U shakar, turli pishiriqlar, guruch, qovurilgan ovqatlarni ratsionidan chiqarib tashladi. Sut mahsulotlarini ham me’yorida iste’mol qildi. Uzerli interval ochlik (16/8) usulini qo‘lladi: 16 soat och yurib, 8 soat ichida faqat 2 mahal ovqatlandi. Biroq bunday rejimni shifokor tavsiyasisiz boshlash mumkin emas.
Hulya Avshar
“Muhtasham yuz yil: Ko‘sem imperiyasi” serialidagi Safiya sulton rolini ijro etgan Hulya Avshar mazali ovqatlarni yaxshi ko‘radi, ammo qomatini ham e’tibordan chetda qoldirmaydi. Aktrisa ikki mahal ovqatlanishni ma’qul ko‘radi: nonushtaga u bir burda non, meva, tvorog va tonus beruvchi ichimliklar, tushlik uchun sho‘rva, qaynatilgan go‘sht va sabzavotlardan iborat taomlarni iste’mol qiladi. Soat 19:00 dan keyin aktrisa hech narsa yemaydi. Bundan tashqari, Hulya bo‘sh vaqtini sportga bag‘ishlaydi: tennis o‘ynaydi, velosipedda uchadi, suzadi yoki sport zalida mashq qiladi.
Jansu Dere
“Muhtasham yuz yil” va “Bevafo” seriallarining yulduzi Jansu Dere qat’iy parhezlar va interval ochlikni yoqlamaydi, chunki aktrisada diyetani buzib qo‘yish ehtimoli katta. U o‘zining nafis qomatini genlarga hamda to‘g‘ri ovqatlanish odatlariga bog‘liq deb biladi. Uning shiori: “Sen nima yesang, o‘shasan”.
Fastfud, qovurilgan taomlar, zararli gazaklar, chips, gazli ichimliklar, qahva va shirinliklar aktrisaning ratsionidan uzoq yillar avval chiqarib tashlangan. Jansu tovuq go‘shti, baliq, xom va dimlangan sabzavotlar, don mahsulotlari va yog‘ miqdori kam sut mahsulotlarini afzal ko‘radi. Nonushta qilishdan avval u bir qoshiq o‘simlik yog‘ini ichadi. Shuningdek, aktrisa faol hayot tarziga ham amal qiladi.
Izoh (0)