Ikkinchi jahon urushi qatnashchisi Ro‘ziboy bobo Sattorovning istagi amalga oshdi, deb xabar bermoqda Qashqadaryo viloyati hokimligi matbuot xizmati.
Kuni kecha viloyat hokimi Murodjon Azimov prezidentning tabrigini o‘qib eshittirish uchun O‘zbekistondagi eng keksa Ikkinchi jahon urushi qatnashchisi xonadoniga tashrif buyurgan edi. Qamashilik Ro‘ziboy bobo Sattorov 115 yoshni qarshi olgan.
Bugun, 10-may kuni esa Ikkinchi jahon urushi qatnashchisi Ro‘ziboy bobo Sattorovning istagi amalga oshib, prezident yuborgan maxsus samolyotda parvozni amalga oshirdi.
Ma’lumot uchun, Ikkinchi jahon urushi yillarida Qashqadaryo viloyatidan 47 051 nafar o‘g‘lonlar frontga jo‘natilgan. Ularning 24 974 nafardan ortig‘i jang maydonlarida halok bo‘lgan.
Bugungi kunda viloyat bo‘ylab tinch va osuda hayot kechirayotgan 3 nafar urush qatnashchilariga hurmat va ehtirom ko‘rsatilmoqda, shuningdek, jang-u jadallarda halok bo‘lganlar xotirasi e’zozlanmoqda.
Xususan, Ikkinchi jahon urushi faxriysi, 115 yoshli (urushga qatnashganlar ichida eng yoshi ulug‘i) Ro‘ziboy bobo Sattorov hisoblanadi.
Prezidentning 19-fevraldagi qaroriga muvofiq, urush va mehnat faxriylariga munosib hurmat ko‘rsatilmoqda. Ikkinchi jahon urushi qatnashchilari va nogironlariga 10 ming AQSH dollari miqdorida, ushbu toifaga tenglashtirilgan shaxslarga 25 million so‘m, mehnat fronti qatnashchilariga 3 million so‘mdan bir martalik pul mukofotlari berilmoqda. Ko‘plab muhtaram nuroniylarga “Ikkinchi jahon urushidagi g‘alabaning 80-yilligi” yubiley medallari topshirilmoqda.
Urush faxriylari va nogironlari uchun tibbiy va ijtimoiy xizmatlar, jumladan, patronaj xizmati ko‘rsatilmoqda. Ular o‘z xohishlariga ko‘ra sanatoriylarda davolanmoqda.
Tegishli vazirlik, idora va tashkilotlar, harbiy qismlar rahbarlari ishtirokida urush va mehnat faxriylari, mustaqillik yillarida xizmat burchini bajarish chog‘ida halok bo‘lgan harbiy xizmatchilar va huquqni muhofaza qiluvchi organlar xodimlarining oila a’zolarining holidan xabar olinib, yumushlariga yordamlashilmoqda.
Izoh (0)