“Muhtasham yuz yil” seriali tomoshabinlarga ko‘plab iste’dodli turk aktyor va aktrisalari bilan tanishish imkonini berdi. Ularning karyerasi davomida ko‘plab boshqa loyihalar bo‘lishiga qaramay, aynan shu tarixiy loyihadagi rollari bilan mashhur bo‘ldi. Quyida mashhur serialda bosh rollarni ijro etgan yulduzlarning boshqa seriallardagi ishtirokini baholashga taklif qilamiz.
“Bobil” (2020)
Professor Irfonning hayoti bir kunda o‘zgarib ketadi — u universitetdan haydaladi, o‘g‘liga esa jiddiy tashxis qo‘yiladi. Muammolar tufayli qahramon tavakkal qilishga qaror qiladi va badavlat tadbirkordan katta miqdorda qarz olib, yoshlikdagi do‘sti bilan firibgarlik yo‘liga kiradi. Ammo Irfon buning uddasidan chiqa olmaydi, balki aksincha, muammolar botqog‘iga yanada chuqurroq botadi. Shunday kunlarning birida uning avvalgi muhabbati hayotida paydo bo‘ladi va vaziyat yanada murakkablashadi. Endilikda Irfon va Egemenni hal qilishi kerak bo‘lgan ko‘plab muammolar kutib kutadi.
“Bobil” seriali ko‘plab dizi muxlislarining e’tiboridan chetda qolmagan qiziqarli loyihadir. Ajoyib aktyorlik tarkibi, mafiyalar jamoasi nayranglari, sevgi, do‘stlik, xiyonat va oila kabi dolzarb muammolar yoritilgan serial turk yulduzlari muxlislariga manzur bo‘lishi shubhasiz.
Bosh rollarda: Halit Ergench, Nur Fettaho‘g‘lu, Ozan Guven va boshqalar.
“Kanaga” (2018)
Mardin Tamai — otasini izlashga ketgan kvant fizikasi mutaxassisi. Uning otasi arxeolog bo‘lib ishlagan va bir necha yil avval to‘satdan g‘oyib bo‘lgan. Mardin otasining do‘sti bilan uchrashib, oldinda uni ko‘plab ochilmagan sirlar kutayotganini anglaydi. U nafaqat padarining g‘oyib bo‘lgani sababini, balki o‘zining qanday dunyoga kelgani va bolalikdagi tarixi haqida haqiqatni bilib oladi.
“Kanaga” Turkiya seriallari standartlariga ko‘ra umuman o‘zgacha yo‘nalish va mavzudagi loyihadir. Aktyor Mehmet Gunsur ishtirokidagi mini serialda ilm-fan va fentezi janrlari birlashgan. Unda kvant fiziklari, yashirin kuchlar mavjudligini eʼtirof etuvchi okkultistlar, yuqori intellekt, vaqt spirali kabi mavzular yoritiladi va tomoshabinni butunlay o‘ziga jalb qiladi.
Bosh rollarda: Mehmet Gunsur, Kevork Malikyan, Ertug‘rul Dog‘an va boshqalar.
“Jonim fido” (2018)
Kapitan Alparslon maxsus harbiy bo‘lim boshlig‘i bo‘lib, u doimo rahbariyat buyruqlarini sidqidildan bajarib keladi. Kapitan o‘zining va qo‘l ostidagilarning hayoti doim xavf ostida bo‘lishiga o‘rganib qolgan. Ammo u turk armiyasiga va, xususan, uning bo‘limiga qarshi rejalashtirilgan fitna haqida bilib qoladi va Alparslon oldida juda murakkab vazifa paydo bo‘ladi: u o‘z hayotini saqlab qolishi va xoinlarni fosh etishi kerak bo‘ladi.
Burak O‘zchivit va Kerem Bursin ishtirokidagi drama ushbu aktyorlar avval suratga tushgan boshqa loyihalardan tubdan farq qiladi. Mazkur serialda ular turk harbiy kuchlarining jasur jangchilari sifatida gavdalanadi.
Bosh rollarda: Burak O‘zchivit, Kerem Bursin, Melike Yalova va boshqalar.
“Bol qaymoq” (2018)
Odam va Havvo umr bo‘yi birga yashab kelgan keksa turmush o‘rtoqlardir. Biroq qarigan chog‘da ular shu qadar katta janjal qiladiki, to‘polon butun qishloqni ikki lagerga bo‘lib tashlaydi. Odam qishloqdagi eng yaxshi asalni ishlab chiqaradi, Havvo esa eng mazali qaymoq tayyorlaydi. Yoz kunlarining birida ularning Bade ismli nabirasi qishloqqa tashrif buyuradi. Uning ota-onasi Bade chaqaloqligida vafot etgan bo‘ladi. Ammo uni qishloqdagilar ochiq chehra bilan kutib olmaydi. Bade o‘zining yoshligiga qaramay, vaziyatni to‘g‘rilashga qaror qiladi, shunday qilib u Havvo va Odamni yarashtirishga bel bog‘laydi.
Mazkur film oila davrasida ko‘rish mumkin bo‘lgan ezgulik va mehrga to‘la loyihadir. Unda uch nafar turk yulduzi — Filiz (Nigor xalfa), Sabina (Afifa xotin) va “Muhtasham yuz yil” filmida ishtirok etmagan bo‘lsa-da, tomoshabinlarga yaxshi tanish bo‘lgan Beren Gokyildiz bosh rollarni ijro etgan.
Bosh rollarda: Filiz Ahmet, Sabina Ayrula, Beren Gokyildiz va boshqalar.
“RU: Turk oshxonasi” (2024)
Rayyon — hayotida qiyin davrni boshdan kechirayotgan, ammo moliyaviy jihatdan muvaffaqiyatli ayol. Turmush o‘rtog‘i bilan ajrashgach, restoranga egalik qilish huquqini saqlab qolishga muvaffaq bo‘ladi. Aynan shu yerda bosh qahramon o‘zidan ancha kichik bo‘lgan Uzer ismli yigitni uchratadi. Ularning orasidagi 20 yosh farq juftlikning his-tuyg‘ulariga to‘sqinlik qilmaydi, ammo Rayyon va Uzer atrofdagi odamlarning turli tanqidlariga dich keladi.
Bosh rollarda: Maryam Uzerli, Burak Berkay Akgul, Emre Karael va boshqalar.
“Turkcha detektiv” (2023)
Serialning nomi uning syujetini to‘liq aks ettiradi. Unga ko‘ra, Chetin Ikmen ismli tergovchi qotillik bo‘limini boshqaradi. U o‘z sohasining haqiqiy professionali va har bir operatsiya ortida bosh rolda turadigan muhim kadrdir. Aynan uning qo‘l ostida Oysha Farsaho‘g‘lu va Londondan qaytgan tergovchi Mehmet Sulaymon ishlaydi. Birgalikda ular nafaqat eng murakkab jinoyatlarni tergov qilish, balki shaxsiy muammolarini hal qilishga bel bog‘laydi.
Bosh rollarda: Xaluk Bilginer, Yosamin Allen, Selma Ergench va boshqalar.
“Fi, Chi, Pi” (2017)
Turkiya uchun noodatiy hisoblangan “Fi Chi Pi” serialida tanish chehralar talaygina. Masalan, bosh rollarni Mehmet Gunsur hamda O‘zan Guven ijro etgan. Psixologik triller markazida iste’dodli psixiatr Jan Manay turadi. U muvaffaqiyatli karyera qurib, o‘z sohasining haqiqiy yulduziga aylangan. Muammo shundaki, uning ham qalbida qorong‘i tomonlari bor va bu tomonlar unga balerina Duru yoqib qolgan paytdan boshlab tobora aniq ko‘rina boshlaydi. U sevib qoladi, lekin bu tuyg‘u muhabbatdan ko‘ra ko‘proq qaramlikka o‘xshaydi. Axir Jan psixologik hiylalarni yaxshi biladi. So‘ng u Duru va qallig‘ining hayotini tun-u kun kuzatishni boshlaydi.
Bosh rollarda: Mehmet Gunsur, Ozan Guven, Serenay Sarikaya, Berrak Tuzyunatach va boshqalar.
Izoh (0)