Qaysi turk aktyori serialning bir qismida suratga tushish uchun 40 ming dollar oladi?

Xorijiy matbuot maʼlumotlariga ko‘ra, hozirda butun dunyoda mashhur va boy bo‘lgan turk seriallari yulduzlarining ro‘yxati tuzildi va ular qancha pul topishi, qayerga investitsiya qilishi hamda qanday uy-joy sotib olishi hisoblab chiqildi.

Burak O‘zchivit (40 yoshda, uylangan, ikki o‘g‘li bor)

“Choliqushi”, “Muhtasham yuz yil”, “Sevgi iztirobi”, “Hukmdor Usmon” seriallarining yulduzi Burak O‘zchivit yaxshi pul ishlashi maʼlum. Turkiya kino sanoatida ish haqini suratga olish kunlari uchun emas, balki qismlar bo‘yicha hisoblaydilar (bir qismni 5 dan 8 kungacha suratga olishlari mumkin). Burak O‘zchivit bir qism uchun kamida 6 500 dollar, maksimal 11 000 dollar oladi. Bu loyihaning miqyosiga, qismlar soniga, shaxsiy manfaatlariga, shartnoma shartlariga va boshqa omillarga bog‘liq. “Hukmdor Usmon” serialida u bir qism uchun 8 500 dollarlik shartnoma tuzgan. Turmush o‘rtog‘i, aktrisa Fahriye Evjenning serial bir qismi uchun ish haqi esa 3 900 dollar.

O‘zchivit yoshligida model bo‘lib ishlagan va hozir Turkiya havo yo‘llari, kiyim-kechak brendlari, erkaklar kosmetikasi va boshqa ko‘plab mahsulotlarni reklama qiladi. Uning reklama shartnomalari kamida 80 000 dollarga baholanadi. Xorijiy matbuotda O‘zchivitning boyligi 70 million dollardan ko‘proq deb baholanadi.

Burak O‘zchivit ko‘chmas mulkka investitsiya qiladi, qolganini esa bank hisobraqamlarida saqlaydi. So‘nggi olti oy ichida aktyor Istanbulning elita tumanlaridan ikkita uy sotib oldi. Oilaga tegishli birinchi villa 500 kvadrat metr maydonga ega bo‘lib, 2,3 million dollarga sotib olingan, ikkinchi villa esa 900 kvadrat metr maydonga ega bo‘lib, 4,2 million dollarga sotib olingan. Burak oilasi keng, 4 qavatli villaga ko‘chib o‘tdi, ikkinchi villani esa ijaraga berishmoqchi. Aktyor Bodrumda 922 000 dollarga sotib olingan villani kichik o‘g‘li, 2 yoshli Keremga sovg‘a qilgani maʼlum bo‘lgan. Ehtimol, 5 yoshli Karanning ham kelajakda o‘z uyi bo‘lishi mumkin.

Hande Erchel (31 yoshda, turmushga chiqmagan)

“Qalbim eshigini qoq”, “Malikam, endi qara”, “Mutlaqo boshqacha” “Uni shamolga qoldiring” seriallari bilan barchaning qalbidan joy olgan Hande Erchel turmushga chiqmagan. U “Qalbim eshigini qoq” serialidagi hamkori Kerem Bursin bilan bir yildan kamroq vaqt uchrashdi. 2022-yilning dekabridan beri u otasining kompaniyasida direktorlar kengashiga aʼzo bo‘lgan 33 yoshli turk milliarderi Hakan Sabanji bilan munosabatda. Biznes dengiz va havo transporti bilan bog‘liq. Kelajakda u oilaviy biznesni boshqaradi. Sabanji Hande bilan uchrashgunga qadar ijtimoiy hayotning qahramoni edi – modellar bilan uchrashib yurar edi. Dastlab Sabanji oilasi Hande Erchel bilan munosabatni maʼqullashmadi: biznesmenning onasi Arzu Sabanji Hakan bilan oila qurish uchun Hande karyerasidan voz kechishi kerakligini aytgan edi. Biroq o‘g‘lining aktrisa bilan bo‘lgan munosabatlari uzoq muddatli ekanligini ko‘rib, Sabanji oilasi Erchelni qabul qildi. Ammo to‘ydan hali ham darak yo‘q va bu mavzuga oid savollarga aktrisa javob bermaydi.

Kelin ham boy. Uning boyligi kamida 6 million 600 ming dollar deb baholanadi. Yulduzning bir qism uchun gonorari 5 ming 300 dollardan boshlanadi. Loyihaga qarab ikki baravar ko‘proq ham bo‘lishi mumkin. Aktrisa, shuningdek, reklamada ham suratga tushadi.

Investitsiyalarning biri ko‘chmas mulkka kiritilgan. Hande Erchel Istanbulning elita tumanlaridan birida ikki qavatli villani sotib oldi. Istanbulda shunga o‘xshash villalarning narxi 1 million dollardan oshadi. Keyin u uyda dizaynerlik taʼmirini amalga oshirdi.

Halit Ergench (54 yoshda, uchta farzandi bor)

“Muhtasham yuz yil” serialidagi sulton Sulaymon — Halit Ergench turk seriallarini sevuvchilar orasida eng mashhur qahramon. Serial 4 mavsum, 139 qismdan iborat edi. Bosh rol ijrochisi Halit Ergenchning gonorari boshqa aktyorlar orasida eng yuqori — bir qism uchun 20 ming dollar edi. U serialning boshqa mamlakatlarda namoyish etilishi uchun foiz oladigan yagona aktyor bo‘lib, bu uning haqini o‘rtacha 2 baravarga oshirgan. Loyihaning muvaffaqiyatidan so‘ng u faqatgina katta pulga suratga tushadi. Hozirda uning bir epizod (qism) uchun o‘rtacha ish haqi 14 000 dollar. Aktyorning boyligi ilgari 5,5 million dollarga baholangan.

Halit Ergench “Ming bir kecha” serialida aktrisa Berguzar Korel bilan birga rol o‘ynagani uchun birinchi xotinidan ajrashgan. Hozirda Halit va Berguzar uchta farzandni tarbiyalamoqdalar. Uchinchi farzandi tug‘ilgandan so‘ng ular Istanbuldan Londonga ko‘chib o‘tishdi, u yerda turk mahallasidan uy sotib olishdi. Aytishlaricha, ular bolalarining taʼlimi uchun ko‘chib o‘tishgan. Ammo ular ikki yil yashab, 2024-yilda Istanbuldagi elita tumanida joylashgan uyiga qaytishdi. Ular darhol filmlarga suratga tushishga kirishdilar, Londonda esa ishsiz o‘tirishgan edi. Nikohning boshida er-xotin Berguzarga tegishli 160 kvadrat metrlik hovli uyda yashashgan. Ergench yuqori haqli yulduzga aylanganidan so‘ng, ular Istanbulning nufuzli tumanlaridan 200 kvadrat metrlik hovuz va terrasali villa sotib olishdi.

Uraz Kaygilarog‘lu (37 yoshda, ajrashgan, qizi bor)

“Egey dengizi balig‘i”. “Elchining qizi”, “Uch qurush”, “Aktrisa” seriallaridagi roli bilan tanilgan aktyor Uraz besh yil davomida aktrisa Melis Ishiten bilan yashab, 2019-yilda ajrashgan va qizlarini birgalikda tarbiyalash uchun do‘st bo‘lib qolishgan. Hozirda aktyorning sevgilisi bor – u Urazning janjalga aralashishiga sabab bo‘lgan 28 yoshli fotograf Sayna Suleymanpur. Uraz qallig‘ining fotosurat ko‘rgazmasining bir qismida rol o‘ynab, qizning g‘oyasini amalga oshirgan va buning uchun u ayollarga nisbatan shafqatsiz munosabatda bo‘lganlikda ayblangan. Haqiqat tezda oydinlashdi va hamma bu voqea haqida unutib ham yubordi.

Uraz Kaygilarog‘luning seriallarning bir qism uchun o‘rtacha ish haqi 11 000 dollar. Maʼlumki, aktyor sobiq xotini va qizini uy-joy bilan taʼminlagan — ularga uy sotib olgan. So‘ng o‘zi uchun Istanbulning elita tumanlaridan birida villa sotib olgan. Urazning boyligi miqdori nomaʼlum. Kino bilan bir qatorda u reklamada ham suratga tushadi.

Kerem Bursin (37 yoshda, uylanmagan)

“Qalbim eshigini qoq” serialining bosh qahramoni Kerem Bursin qizlar orzusidagi kuyov bo‘lasa-da, hozircha oila qurishga muvaffaq bo‘lmadi. Hozirda u Hande Erchelning sevgilisi Hakan Sabanjining qarindoshi bo‘lgan qiz do‘sti Melis bilan baxtli. Melisning bobosi esa milliarder va yozuvchi Sakip Sabanji.

Aktyor Kerem Bursinning bir qism uchun ish haqi 4 000 dollardan boshlanadi. Biroq u reklamadan ancha katta miqdorda pul topadi. Aktyorning boyligi 11 million dollarga baholanadi. Ikki yil oldin Bursin Istanbulning obro‘li tumanlarining biridan, Qora dengizga qaragan uch qavatli uy sotib olgan.

Jan Yaman (35 yoshda, uylanmagan)

“To‘rg‘ay”, “To‘lin oy”, “Janob xato” seriallarining bosh qahramonlaridan biri Jan Yaman yaqinda Moskvada “El Turko” serialini taqdim etdi. Turkiya matbuoti xabar berishicha, ushbu xalqaro loyihada aktyorning bir qism uchun gonorari rekord darajada — 40 000 dollarni tashkil etgan. Turkiyadagi gonorari esa undan uch baravar kam edi. Besh yil oldin Jan Yaman Istanbuldan Rimga ko‘chib o‘tgani bejiz emas — u xalqaro karyera qurishga qaror qilgan. Rimda aktyor nafaqat yangi rollarga takliflarni, balki bir nechta jahon brendlari bilan reklama shartnomalarini ham imzoladi. Aytishlaricha, birgina Mercedes-Benz bilan bo‘lgan reklama shartnomasi 1 million yevro atrofida.

Jan Yamanni eng aqlli turk aktyori deb atashadi. U Istanbuldagi italyan litseyida yaxshi o‘qigan, hatto eng aʼlochi o‘quvchi sifatida stipendiya olgan, Istanbul universitetining yuridik fakultetini aʼlo darajada tamomlagan, yirik xalqaro kompaniyada advokat bo‘lib ishlagan. Sudda uning taʼsirli gapirganini ko‘rgan do‘stlari uni aktyorlik agentlariga tavsiya qilishgan. U turk, italyan, ingliz tillarida erkin gapiradi va rol o‘ynaydi. Hozirda ispan tilini o‘rganmoqda, kelajak rejalarida rus tili ham bor.

Jan Yaman Istanbuldan ota-onasiga uy sotib olgan. O‘zi esa Rimda Kolizeyga qaragan keng xonadonni ijaraga oladi. Avvaliga aktyor italyan teleboshlovchisi bilan ishqiy munosabatda bo‘lgan, so‘ng qiz munosabatlarni rasmiylashtirishni istamagani uchun ajrashishgan, hozir esa aktyor italyan aktrisasi bilan munosabatda.