Har birimizning hayotimizda oq va qora kunlar bo‘lgani kabi turk yulduzlari ham karyerasida kichik muvaffaqiyatsizliklarga uchrab turadi. Dunyoda yigirmadan ortiq tillarga tarjima qilingan seriallarda ishtirok etgan aktyorlar oddiy va hatto yomon reytingga ega loyihalarda ham ishlagan.
Bugun biror ishda xatoga yo‘l qo‘ygan bo‘lsangiz ham taslim bo‘lmaslik va o‘z ustingizda ishlashdan to‘xtamaslikka motivatsiya beradigan turk yulduzlarining eng muvaffaqiyatsiz loyihalarini to‘plashga qaror qildik.
Kerem Bursin — “Jonsizlar”
Vampirlar haqidagi serialda bosh qahramonni gavdalantirgan “Jonsizlar” seriali yuqori reyting egallashi kutilgan edi, ammo turk tomoshabinlari noodatiy ssenariy va prodyuserlarning o‘zgacha talqindagi serialini munosib baholamadi. Natijada loyiha xalqaro bozorga ham chiqa olmadi. Shundan keyin butun dunyoda “Sumerki” filmi mashhurlikka erishdi. “Jonsizlar” serialida Kerem Bursin mashhur aktrisa Elchin Sangu bilan suratga tushgan.
Hande Erchel — “Qora marvarid”
“Qora marvarid” haqida kamdan kam odam eshitgan bo‘lsa kerak. Serial Hande karyerasidagi eng yomon loyiha hisoblanadi. Tanqidchilarning so‘zlariga ko‘ra, aktrisaning serialdagi roli ishonchsiz chiqqan. Unda klassik sevgi hikoyasi haqida so‘z boradi: uchinchi shaxs aralashuvi sababli ikki yosh birga bo‘la olmaydi.
Balki serial muvaffaqiyatsizligining sababi o‘sha vaqtda deyarli o‘xshash syujetli serial — “Sevgi iztirobi” berilgani uchundir? Sababini anglash uchun vaqt ajratib, “Qora marvarid” serialini ko‘rib chiqish mumkin.
Burak O‘zchivit — “Sevgi senga o‘xshaydi”
Hozirda rafiqasi bo‘lgan Fahriye Evjen bilan suratga tushgan mazkur serial Burak O‘zchivit uchun omadisiz bo‘lgan. Aktyorga hatto “Muhtasham yuz yil” serialidagi Balibey obrazidan keyingi mashhurlik ham yordam bera olmagan. Serial muvaffaqiyatsizligiga puxta o‘ylanmagan ssenariy, ko‘plab sahnalardagi qo‘pol xatoliklar va rejissyor ishi sabab bo‘ldi. “Sevgi senga o‘xshaydi” serialida aslida kelishgan O‘zchivit qiyofasi ham xunuk qilib ko‘rsatilgan.
Halit Ergench — “Bobil”
Mazkur loyihada “Muhtasham yuz yil” seriali qahramonlaridan Xalit Ergenchdan tashqari Nur Fettaho‘g‘lu (Mohidavron) ham rol ijro etdi, shu sababli ushbu serial eng yaxshi reytingda bo‘lishiga umid bog‘langandi. Lekin loyiha “o‘rtacha” bo‘lishga muvaffaq bo‘ldi. Dastlabki epizodlar tomoshabinlarda katta qiziqish uyg‘otdi, lekin vaqt o‘tib ijodkorlar loyihani tugatishga majbur bo‘ldi.
Meryem Uzerli — “Asal uyasi”
Rejissyor Eylem Kaftan tomonidan suratga olingan mazkur serial 2019-yilda Netflix tomonidan taqdim etildi. Dramada sobiq Xurram obrazi bilan tanilgan Meryem Uzerli qahramonining asl maqsadi nima ekanligini hamma ham tushuna olmadi.
Syujetga ko‘ra, shaharlik qiz og‘ir kasal onasini boqish uchun Turkiya shimoli-sharqidagi ona shahriga qaytadi. O‘limidan oldin qahramon onasining sevimli ari uyalariga g‘amxo‘rlik qilishini qizidan so‘raydi. Asalarilardan qo‘rqqan qiz onasining so‘nggi istaklarini bajarishda turli qiyinchiliklarga duch keladi.
Shukryu Ozyildiz — “Qish quyoshi”
“Qish quyoshi” loyihasining syujeti xuddi Bollivud kinolaridek bo‘lib chiqdi. Unda ikki aka-uka Efe va Metening taqdiri haqida hikoya qilinadi. Ular barcha insonlar orzu qiladigan narsalarga ega. Bir kuni ularning ota-onasi noma’lum shaxslar tomonidan o‘ldirib ketiladi, Efe esa qotillikning guvohi bo‘ladi. Psixologik travma olgan qahramoni qochib ketadi va 20 yildan so‘ng bolalik xotiralarini unutadi. Ssenariy va voqealar rivoji shunchalik chalkashki, tomoshabin madaniy hordiq chiqarish o‘rniga tushunarsiz ssenariydan charchab qoladi.
Izoh (0)