Bugungi qahramonlar turk seriallarining xalqaro sahnadagi muvaffaqiyatining ajralmas qismiga aylangan. Har bir yangi loyihadagi ishtiroki bilan ushbu aktyorlar Turkiya kino sanoatida yetakchi davlatlardan biri sifatidagi mavqeyini mustahkamlashida o‘z hissasini qo‘shmoqda. Aktyorlarning xarizmasi va o‘ziga xosligi tufayli ularni Instagram’da millionlab obunachilar kuzatadi, ular bilan tuzilgan reklama shartnomalarining ro‘yxati esa tugamaydi. E’tiboringizga Turkiyaning eng mashhur besh nafar aktyori haqida ma’lumot beramiz.
5-o‘rin: Jan Yaman (Instagram’dagi obunachilari soni 8,8 million)
Jan Yaman “To‘rg‘ay” romantik komediyasidagi Jan Divit roli orqali tomoshabinlar qalbini zabt etdi. Bosh qahramonlar o‘rtasidagi hazil-mutoyiba va o‘zaro munosabatlar jozibasiga boy bu serial chinakam hitga aylandi.
“To‘rg‘ay” serialidan so‘ng aktyor bir qancha muvaffaqiyatli loyihalarda, jumladan, “Dengiz kabi binafsha” nomli italyan serialida ishtirok etdi va hozirda yangi cho‘qqilarni zabt etishda davom etmoqda. Shuningdek, Jan Yaman bir nechta tillarda erkin so‘zlasha oladigan aktyordir.
4-o‘rin: Aras Bulut Iynemli (Instagram’dagi obunachilari soni 7,4 million)
Aras Bulut Iynemli — shuhrati Turkiya chegaralaridan tashqariga chiqqan aktyorlardan biri. “Muhtasham yuz yil” serialidagi shahzoda Boyazid roli unga katta mashhurlik olib keldi. Tomoshabinlar uning dramatik iste’dodi va qahramonning murakkab his-tuyg‘ularini mahorat bilan yetkazish qobiliyatini yuqori baholadilar.
Arasga yanada ko‘proq shuhrat keltirgan rol esa “Chuqur” nomli dramadagi Mert Qaradag‘ obrazi bo‘ldi. Bu asarda u ta’sirli mafiya oilasining a’zosi rolini ijro etdi, bunda oila oldidagi majburiyat va shaxsiy axloqiy qarashlar o‘rtasida bo‘linib qolgan qahramonni gavdalantirdi. Ushbu rol Aras iste’dodining serqirraligini namoyon etdi va uning eng talabgir turk aktyorlaridan biri maqomini mustahkamladi.
3-o‘rin: Mert Ramazon Demir (Instagram’dagi obunachilari soni 8,8 million)
Yosh va iste’dodli Mert Ramazon Demir “Qo‘rg‘on sirlari” serialidagi Ferit Korxan rolini ijro etib, shuhrat cho‘qqisiga ko‘tarildi. Syujetning cho‘zilgani va ba’zi ssenariy yechimlari haqidagi ziddiyatli fikrlarga qaramasdan, serial katta muvaffaqiyatga erishdi. Albatta, serialning mashhurligi ko‘p jihatdan Mertning yorqin aktyorlik mahorati tufayli yuz berdi.
Uning qahramoni — boy, erka, shu bilan birga, zaif va muhabbat izlayotgan yigit tomoshabinlarda turli xil his-tuyg‘ularni uyg‘otadi, ammo hech kimni befarq qoldirmaydi. “Qo‘rg‘on sirlari” filmidan avval Mert bir nechta seriallarda, jumladan, Netflix uchun ishlangan loyihalarda ham rol ijro etishga ulgurgan.
2-o‘rin: Kerem Bursin (Instagram’dagi obunachilari soni 11,3 million)
Kerem Bursin “Qalbim eshigini qoq” seriali efirga chiqqanidan so‘ng chinakam sensatsiyaga aylandi. Boylik va hokimiyat egasi Serkan Bolat bilan oddiy qiz Eda o‘rtasidagi muhabbat qissasi millionlab tomoshabinlarni o‘ziga rom etdi.
Kerem obrazi idealdan yiroq va hatto ba’zan zo‘ravonlikka moyil xulq-atvorni ifodalasa-da, aktyorning xarizmasi, uning benuqson tashqi ko‘rinishi va suratga olish maydonchasidagi hamkori Hande Erchel bilan o‘zaro uyg‘unligi Serkan Bolatni afsonaviy qahramonga aylantirdi. Kerem kino va seriallarda, jumladan, Amazon Prime Video platformasi uchun ham faol suratga tushishni davom ettirmoqda.
1-o‘rin: Burak O‘zchivit (Instagram’dagi obunachilari soni 25,5 million)
Burak O‘zchivit top-5 ro‘yxatimizning, shak-shubhasiz, yetakchisi hisoblanadi. Uning muvaffaqiyat yo‘li “Muhtasham yuz yil” serialidagi Malkocho‘g‘li Bali Bey roli bilan boshlangan. So‘ngra “Sevgi iztirobi” seriali unga jahon miqyosidagi mashhurlik keltirdi va eng taniqli turk aktyorlaridan biri maqomini mustahkamladi. Hozirda Burak “Hukmdor Usmon” tarixiy serialida suratga tushishda davom etmoqda.
Burak O‘zchivit dunyo bo‘ylab turli tadbirlarda, jumladan, Toshkentga tashrif buyurganida ham, e’zozli mehmon sifatida kutib olingan. Shuningdek, u Rossiyaning “Archa 11” Yangi yil filmida ham rol ijro etgan.
Bonus: Mert Yazichio‘g‘lu (Instagram’dagi obunachilari soni 2,6 million)
Mert Yazichio‘g‘lu “Alvon g‘unchalar” serialidagi Juneyd roli bilan jamoatchilik e’tiborini tortdi. Turli ijtimoiy muammolarni ko‘targan ushbu serial nafaqat Turkiyada, balki xorijda ham mashhur bo‘ldi.
Mert murakkab va ziddiyatli obrazni shunday mahorat bilan ijro etdiki, bu unga o‘zining aktyorlik salohiyatini to‘liq namoyon qilish va tomoshabinlarning e’tirofiga sazovor bo‘lish imkonini berdi. Garchi uning muxlislari bizning ro‘yxatimizdagi boshqa aktyorlarga nisbatan kamroq bo‘lsa-da, Mert Yazichio‘g‘lu, shubhasiz, turk kinosining porlab kelayotgan yulduzi hisoblanadi.
Izoh (0)