Kino olami ko‘pchilik uchun orzular mamlakatidek tuyuladi. Ammo shunday san’atkorlar borki, aktyorlikni hech qachon reja qilmagan, hattoki bu kasb haqida orzu ham qilmagan. Ular umuman boshqa sohalarda ta’lim olgan yoki mutlaqo o‘zgacha kasbda faoliyat boshlagan va natijada tasodif yoki qiziqish tufayli kamera qarshisida paydo bo‘lishgan.
Ushbu maqolada biz turk kinosi yulduzlarining asl kasblari va ular qanday qilib mashhurlikka erishgani haqida so‘z yuritamiz.
1. Burak O‘zchivit
“Muhtasham yuz yil” va “Hukmdor Usmon” seriallari yulduzi bolaligidan ekran haqida orzu qilgan, lekin o‘sha paytda o‘zini multfilm qahramoni sifatida ko‘rgan. Avvaliga tasviriy san’at fakultetida o‘qigan. Uning otasi Burakni oilaviy restoranida ishlashini xohlagan, ammo yigit boshqa yo‘lni tanlagan va model bo‘lib ishlay boshlagan. Ma’lum vaqtdan so‘ng O‘zchivit “Mamlakatning eng yaxshi modeli” va “Dunyoning eng yaxshi modeli” unvonlarini qo‘lga kiritganidan so‘ng, prodyuserlar nazariga tushgan. Hozirda esa turk seriallarini ko‘rmaydigan odamlar ham uni yaxshi taniydi.
2. Fahriye Evjen
Burak O‘zchivitning rafiqasi, “Choliqushi” seriali orqali tanilgan Fahriye Evjen aktyorlikka hech qachon kelmasligi mumkin edi, chunki Germaniyada tug‘ilgan va Dyusseldorf universitetida jamiyatshunoslik fakultetida o‘qigan. Garchi bolaligida teatr to‘garagiga qatnashgan bo‘lsa-da, aktrisalik karyerasi haqida umuman o‘ylamagan. Ta’til paytida unga “Hech qachon unutma” serialida o‘zini sinab ko‘rish taklif qilingan, oradan ko‘p o‘tmay “Hazonrezgi” serialida ham rol o‘ynagan. So‘ng Evjen universitetni tashlab ketgan va Bosfor universitetida tarix yo‘nalishiga o‘qishini ko‘chirgan.
3. Kerem Bursin
“Qalbim eshigini qoq” seriali yulduzi Kerem Bursin oilasi bilan tez-tez turli mamlakatlarga ko‘chib yurgan. Dastlab u uzoq vaqt AQShda yashab, ta’lim olgan. Xalqaro kompaniya rahbari bo‘lgan otasi unga barqaror kelajak taqdim etadigan kasb tanlashni tavsiya qilgan. Azaldan kinoga qiziqqan Kerem otasini xafa qilmaslik uchun marketing fakultetiga kirgan, biroq yashirincha aktyorlik kurslariga qatnab yurgan. Onasi uning tanlovini qo‘llab-quvvatlagan. Keremning maqsadi — Gollivudni zabt etish, lekin hozirda u turk seriallari ichidagi eng kelishgan aktyorlardan biri sifatida tanilgan.
4. Janan Erguder
“Oila” va “Menejerimga qo‘ng‘iroq qiling” seriallari aktrisasi Janan Erguder politologiya fanlari professorining qizi. U avval Istanbul universitetida o‘qigan, bir yildan keyin AQShga ko‘chib, u yerda Franklin va Marshall kollejida sotsiologiya va teatr san’ati bo‘yicha tahsil olgan. Bakalavr darajasini olgach, Nyu Yorkdagi aktyorlik maktabida magistrlik darajasini olgan. Aktrisa ingliz, nemis va italyan tillarida bemalol so‘zlasha oladi. Hozirda kino bilan bir qatorda, teatrda ham faol ishtirok etadi.
5. Chag‘atay Ulusoy
“Himoyachi”, “Ichkarida” seriallari yulduzi serqirra iste’dod egasi. U bolaligidan sport bilan professional shug‘ullangan, shuning uchun u basketbol murabbiyi bo‘lishi mumkin edi. Ammo atrofidagilar uning ko‘rinishini modellikka munosib deb hisoblashgan. Ulusoy landshaft dizayni fakultetida o‘qigan. Shu bilan birga aktyorlik kurslariga qatnashgan va modellik orqali pul topgan. Ma’lum vaqtdan so‘ng hatto “Turkiyaning eng yaxshi modeli” unvoniga sazovor bo‘lgan.
6. Beren Saat
“Ta’qiqlangan muhabbat” va “Muhtasham yuz yil: Ko‘sem imperiyasi” seriallari yulduzi bolaligida qo‘shiq kuylashga qiziqqan va ota-onasi uni musiqa maktabiga bergan. Beren ko‘plab tanlovlarda g‘olib bo‘lgan. Yosh iqtidorlar tanlovida esa aktyorlik salohiyati e’tirof etilib, unga bu yo‘nalishda o‘zini rivojlantirish istagi paydo bo‘lgan. Ammo Saat Anqara universitetda menejment bo‘yicha o‘qigan. Chunki bu kasb aktrisalikdan ko‘ra barqaror ekanligiga ishongan.
7. Tolga Saritash
“Ota” va “Va’da” seriallari yulduzi Tolga Saritash bolaligidan musiqaga qiziqqan: u gitara va baraban chalgan, o‘zi tuzgan guruhi bilan sahnalarda chiqqan. Sakkiz yoshidan havaskor teatrda ishlagan. Ammo ota-onasi ijodiy kasblarni jiddiy deb hisoblamagani bois uni geografiya fakultetiga yo‘naltirishgan. Ammo aktyorlik mashg‘ulotlari tufayli Tolga darslardan uzoqlashgan, natijada u o‘qishni masofaviy shaklda davom ettirgan.
8. Afra Saracho‘g‘lu
“Qo‘rg‘on sirlari” va “Ustozlar” seriallari yulduzi juda erta yoshidan mustaqil shaxsga aylanishga majbur bo‘lgan. Otasi bolaligida oilani tark etgan, onasi esa farzandini ta’minlash uchun ko‘p mehnat qilgan. Afra onasining yordamisiz hech narsa bo‘lmasligini tushungan va o‘spirinligidayoq modellik agentligi bilan shartnoma imzolagan. So‘ng kino kastingida qatnashib, ilk rolga qabul qilingan. O‘sha paytda Afra adabiyot fakultetida tahsil olayotgan bo‘lgan.
9. Halit Ergench
“Muhtasham yuz yil” va “Bobil” seriallari yulduzi Halit Ergench o‘zini turli kasblarda sinab ko‘rgan. Uning otasi mashhur aktyor, bastakor va shoir bo‘lgan. Ko‘pchilik Halit ham shu yo‘ldan boradi deb o‘ylagan, biroq u kutilmaganda dengizchi bo‘lish istagini bildirgan. U uzoq masofalarga dengiz orqali amalga oshiriladigan safarlarga juda qiziqqan. Ammo bu kasb ko‘plab texnik bilim talab qilgani uchun tez orada konservatoriyaga hujjat topshirgan.
10. Barish Arduch
“Qo‘rg‘on sirlari” va “Alp Arslon: Buyuk Saljuqiy” seriallari yulduzi bolaligida pahlava sotuvchisi bo‘lishni orzu qilgan. Keyinchalik sportga qiziqib, sport akademiyasida bir yil granti asosida o‘qigan. Ammo ichki bir tuyg‘u uni san’atga yetaklagan va aktyorlik fakultetida tahsil ola boshlagan. Barish Arduch uzoq yillar qutqaruvchi bo‘lib ishlagan va yuzlab odamlarni halokatdan saqlab qolgan.
11. Jan Yaman
“Janob Xatolik” va “El Turko” seriallari yulduzi aktyorlikka kechroq qadam qo‘ygan. Dastlab u huquqshunos bo‘lib ishlagan. Maktabda a’lo baholarga o‘qigan, Istanbul kollejiga tarixdagi eng yuqori ball bilan kirgan, advokatlik bilan shug‘ullangan va o‘zining advokatlik byurosini tashkil etgan. Hobbi sifatida teatr kurslariga qatnagan. So‘ng do‘stlari uni sahnada ko‘rib, kinoga kirishini maslahat bergan. Natijada Jan Yaman muvaffaqiyatli aktyor bo‘lib yetishgan. Hozirda ham u asl kasbidan butunlay voz kechmagan — u advokatlik firmasining direktori hisoblanadi.
Izoh (0)