“Muhtasham yuz yil”, “Qalbim eshigini qoq” yoki “Qo‘rg‘on sirlari” Turkiyada eng shov-shuvli va yuqori reytingga ega serial, deb o‘ylasangiz, adashasiz. Dizi olamida bundan ham yuqori e’tirof etilgan qiziqarli loyiha mavjud. So‘z “Ijaraga olingan sevgi” seriali haqida bormoqda.
Serial nima haqida?
“Ijaraga olingan sevgi” tomoshabinni intrigalar, kutilmagan burilishlar va hayajonli muhabbat olamiga olib boradigan serial. Omer — moda biznesida muvaffaqiyatga erishgan yosh va kelishgan yigit. Uning oilasi Omerning AQSHdan qaytgan qizga uylanishini orzu qiladi.
Qiz nihoyatda go‘zal, o‘qimishli, lekin faqat yuqori jamiyatda porlashni istaydi va o‘z maqsadiga erishish uchun hamma narsani qilishga tayyor. Omerni esa bular mutlaqo qiziqtirmaydi. Qizning dunyoqarashi turk xalqinikidan ajralib turishi yigitga yoqmaydi.
O‘ziga yuklangan bosimdan xalos bo‘lish uchun Omer hammaning ko‘z o‘ngida kamtar, mehribon va chiroyli ofitsiant qiz — Dafnani o‘padi. Bu xatti-harakati uning oilasi va, ayniqsa, xolasining g‘azabiga sabab bo‘ladi, u Omerning hayotini noloyiq qiz bilan bog‘lashiga yo‘l qo‘ymaslik uchun qo‘lidan kelgan hamma ishni qiladi.
Tomoshabinlar nima deydi?
Tomoshabinlar orasida ushbu serial yuqori ko‘rsatkichga ega, buni reytinglar ham tasdiqlaydi. Masalan, “Kinopoisk.ru”da ushbu filmning reytingi 8,3 ball, “Muhtasham yuz yil”ning reytingi esa 8,2 ballga ega.
“Bu shunchaki muhabbat haqidagi odatiy serial emas. Avvaliga serial syujeti boshqa loyihalarnikiga o‘xshash va takroriy tuyuladi, unda badavlat shahzoda hamda kambag‘al va baxtsiz Zolushka hayoti tasvirlanadi. Ammo aktyorlar professional tarzda ijro etgan voqealar rivoji, noodatiy g‘oyalar, qahramonlarning o‘z obrazlarini ajoyib tarzda yetkazib berishi syujetni yanada jozibali qiladi. Natijada tomoshabin ekrandan ko‘z uzolmay qoladi va qahramonlar bilan birgalikda voqealarni boshidan kechiradi”, deb yozadi serial muxlislari.
Loyiha necha qismdan iborat?
Kulgili sahnalar va sof sevgi aks etgan serial ikki mavsum va 54 ta qismdan iborat. Mashhur aktyor Barish Arduch va jozibali aktrisa Enchin Sangu rolini qoyillatib ijro qilgan “Ijaraga olingan sevgi”ni doimiy ravishda tomosha qilsangiz, unga deyarli 17 kun sarflashingiz kerak bo‘ladi. Loyiha bugungi kunda klassikaga aylandi, deb ayta olish mumkin.
Izoh (0)