Украина президенти Владимир Зеленский Россия Федерацияси президенти Владимир Путиннинг май ойидаги уч кунлик сулҳ таклифини рад этди. Бу ҳақда у ўзининг Telegram каналида маълум қилган.
Зеленский таклифни манипуляция деб баҳолаб, уч кунлик эмас, балки 30 кунлик сулҳ зарурлигини таъкидлади.
Биз Украинада бу урушнинг бир лаҳзасини ҳам истамагандик ва доимо тинчликни ўрнатиш ҳамда хавфсизликни таъминлашга ёрдам бера оладиган барча ҳамкорлар билан иложи борича тезроқ ишлашга тайёрлигимизни айтиб келмоқдамиз. Россия эса буларнинг барчасини мунтазам равишда рад этиб, дунёни чалғитмоқда ва Қўшма Штатларни алдашга уринмоқда.
Ҳозир яна бир бор манипуляция қилишга уриниш: негадир ҳамма 8 майни кутиб, шундагина Путиннинг парад вақтидаги сукунатини таъминлаш учун ўт очишни тўхтатиши керак экан. 8 майни кутишга ҳеч қандай асос йўқ. Ўт очишни бир неча кунга эмас, балки дарҳол, тўлиқ ва сўзсиз тўхтатиш керак ва бу камида 30 кун давом этиши лозим, деди Владимир Зеленский.
Россия Федерацияси президенти Владимир Путин Ғалабанинг 80 йиллиги муносабати билан уч кунлик вақтинчалик сулҳ эълон қилди. Унга кўра, 7 майдан 8 майга ўтар кечаси соат 00:00 дан 10 майдан 11 майга ўтар кечаси соат 00:00 гача Россия томонидан барча жанговар ҳаракатлар тўхтатилиши кўзда тутилган.
Шунингдек, хабарда агар Украина томони тинчликни бузса, Россия ҳарбий кучлари “муносиб ва самарали жавоб” беришини билдириб, шу тариқа Россия Украина инқирозининг асл сабабларини бартараф этишга қаратилган дастлабки шартларсиз тинчлик музокараларига тайёрлигини маълум қилган.
19 апрель куни Путин жанговар тўқнашув чизиғида 30 соатлик Пасха тинчлигини эълон қилган эди. Ўшанда у бу қарор инсонпарварлик нуқтайи назаридан қабул қилинганини таъкидлаганди.
Украина президенти Владимир Зеленский “Пасха сулҳи” эълон қилиниши билан дарҳол таклифни рад этганди. Бироқ уч соатдан сўнг, у яна бир баёнот бериб, Украина вақтинчалик тинчлик доирасида жанговар ҳаракатларни тўхтатишга рози эканлигини маълум қилганди.
Россия Мудофаа вазирлиги 21 апрель куни махсус операцияни қайта бошлаганини маълум қилди. Уларнинг маълумотларига кўра, тинчлик даврида Россия тинчлик шартларининг 4900 марта бузилганини қайд этган. Владимир Зеленский эса ўз навбатида Украина Қуролли кучлари бош қўмондони Александр Сирскийнинг ҳисоботига таяниб Россия томонидан 2935 та қоидабузарлик содир этилгани ҳақида хабар берди.
25 апрель куни Владимир Путин АҚШ президентининг махсус вакили Стив Уиткофф билан учрашди. Унда Россия ва Украина ўртасидаги тўғридан тўғри музокараларни қайта бошлаш имконияти муҳокама қилинди. Бу Уиткоффнинг сўнгги уч ой ичида Россияга тўртинчи ташрифи ва АҚШ президентининг махсус вакили ва Путин ўртасидаги учинчи учрашув ҳисобланади.
11 апрель куни Санкт Петербургда бўлиб ўтган учрашувда Уиткофф ва Путин Украинадаги можарони ҳал қилиш масалаларини муҳокама қилган эди. Ўшанда Россия президенти АҚШдан доимий тинчликни таъминлашни сўраганди.
Изоҳ (0)