Украина президенти Владимир Зеленский “тинчлик ўрнатиш учун зарур қадамлар”ни айтди ва уларни амалга оширишга тайёрлигини билдирди. Бу ҳақда сиёсатчи Европа кенгаши йиғилишида маълум қилди.
Ҳамма ишонч ҳосил қилиши зарурки, Россия бу урушнинг ягона манбаи сифатида уни тугатиш зарурлигини тан олади. Буни икки турдаги тинчлик билан исботлаш мумкин: энергия ва бошқа фуқаролик инфратузилмасига ҳужумларнинг тўхтатилиши — ракеталар, бомбалар ва узоқ масофали дронлардан фойдаланиш бўйича ўт очишни тўхтатиш. Иккинчиси эса денгиздаги сулҳ, яъни Қора денгизда ҳарбий операцияларни тўхтатиш, деди Зеленский.
Кейинги қадам сифатида у “музокаралар қандай шароитда ўтаётганига ишонч”, яъни россияликлар алдамаётганига ишонч ҳосил қилиш зарурлигини таъкидлади. Украина президенти бу ишончни мустаҳкамлаш воситаларидан бири сифатида асирларни озод қилиш бўлиши мумкинлигини айтди.
Шуни тушуниш керакки, ҳар қандай сулҳ ва ишончни мустаҳкамлаш бўйича ҳар қандай чора-тадбирлар фақат тўлиқ ва адолатли келишувга, хавфсизлик кафолатлари ва урушни тўхтатиш бўйича кенг қамровли битимга кириш учун муқаддима бўлиши мумкин, деди у.
Зеленский Украина Европа билан тинчлик режаси ва музокаралар жараёнининг барча тафсилотларини баҳам кўришига ишонтирди. Унинг таъкидлашича, тинчликка эришиш жараёнига Украинага ёрдам бераётган ҳар бир давлат қўшилиши керак.
Бундан ташқари, у Европани Украина хавфсизлиги билан боғлиқ ҳар қандай масала Киев иштирокида ҳал қилиниши керак деган позицияни қўллаб-қувватлашга чақирди.
Шунингдек, Зеленский Европа давлатларига Украинага ёрдам беришга қатъий қарор қилгани учун миннатдорлик билдирди, Еврокомиссиянинг Европани қайта қуроллантириш бўйича саъй-ҳаракатларини олқишлаб, уларни “тўғри ташаббус” деб атади ва Украинада қурол ишлаб чиқариш учун мудофаа воситаларининг катта қисмини ажратишга чақирди.
Бизнинг саноатимиз хавфсизликка замонавий таҳдидларни ҳисобга олган ҳолда энг тезкор ва долзарбдир, деди Зеленский.
Украина уруш бошланган илк сониядан бошлаб тинчликка интилиб келмоқда ва биз ҳар доим урушнинг давом этишининг ягона сабаби Россия эканини айтганмиз. Украина нафақат тинчлик йўлида зарур қадамларни ташлашга тайёр, балки бу қадамлар қандай бўлиши кераклигини ҳам таклиф қилмоқда. Шу боис сизлардан бизни қўллаб-қувватлашингизни сўрайман — Украинани ва тинчлик йўлини очишга ёрдам бераётган европалик етакчиларни қўллаб-қувватланг, дея хулоса қилди сиёсатчи.
Изоҳ (0)