АҚШ президенти Дональд Трамп Россия ва Украина ўртасидаги урушнинг янада авж олишини тўхтатиш бўйича саъй-ҳаракатлар “назорат остида” эканини айтди. Бу ҳақда у Outkick портали журналисти Клей Тревисга берган интервьюсида маълум қилди.
Трамп россиялик ҳамкасби Владимир Путин ва Украина президенти Владимир Зеленский билан “яхши” муносабатлари урушни тўхтатиш бўйича музокараларда муҳим эканини таъкидлади.
Бу урушни тўхтатиш имкониятига эга бўлсак ажойиб бўларди. Шуни айтаманки, мендан бошқа ҳеч ким буни уддалай олмайди. Ҳеч ким, деди АҚШ раҳбари.
Трамп Путинни “жуда яхши” билишини яна бир бор таъкидлади ва у президентлиги даврида Россия раҳбари ҳеч қаерга бостириб кирмаганини эслатди.
Путин мен президент бўлганимда ҳеч қаерга бостириб кирмаган. У Буш ва Обама президентлиги даврида Қримни олди, Грузияни олди, у ҳаммасини олишга ҳаракат қилмоқда...Дунёда уни тўхтата оладиган мендан бошқа одам йўқ деб ўйлайман ва мен уни тўхтата олишимга умид қиламан. Биз жуда оқилона музокаралар олиб бордик. Мен шунчаки одамлар ҳалок бўлишини тўхтатишни истайман. Улар ҳар ҳафта 2500 нафар ёш болани йўқотмоқда, булар ҳам руслар, ҳам украинлардир, деди у.
Трамп ўтган ҳафтада аввал Путин, кейин эса Зеленский билан телефон орқали мулоқот қилди. Трамп билан суҳбат чоғида Путин 30 кунлик сулҳ давомида Украинанинг энергетика инфратузилмасига зарба беришни тўхтатишга рози бўлди, бироқ америкаликларнинг ўт очишни тўлиқ тўхтатиш ҳақидаги таклифини рад этди. Зеленский, ўз навбатида, энергетика объектларига зарбаларни ўзаро тўхтатишга рози бўлди. Шу билан бирга, у Киев россияликларнинг зарбаларига муносиб жавоб беришини таъкидлади.
Изоҳ (0)