Россиянинг Москва вилоятида 25 апрель куни автомобиль портлаши оқибатида россиялик генерал Ярослав Москалик ҳалок бўлди. Бу ҳақда маҳаллий аҳолига таяниб, Маш хабар берди.
Ҳодиса Балашиха шаҳрида юз берган, ҳуқуқ-тартибот идоралари ходимлари портлаш сабабларини ўрганмоқда. Дастлабки маълумотларга кўра, автомобилга портловчи қурилма ўрнатилган. У газ баллон ускуналари ёнига жойлаштирилган. Россиялик генерал автомобиль олдидан ўтаётганида қурилма масофадан ишга туширилган.
Россия оммавий ахборот воситаларига кўра, марҳум Россия Қуролли кучлари бош штаби бош оператив бошқармаси бошлиғи ўринбосари Ярослав Москалик бўлган. Тергов қўмитаси портлаш юзасидан жиноий иш қўзғатган. Қайси модда бўйича тергов олиб борилаётгани ҳозирча номаълум.
Москалик 2015 йилда Украина билан “норманд формати” доирасидаги музокараларда иштирок этган, шунингдек, Россиянинг Суриядаги ҳарбий операцияси билан боғлиқ мавзулар бўйича спикер бўлган. Россия президенти Владимир Путин 2021 йилда унга генерал-лейтенант унвонини берган.
2024 йил 17 декабрь куни Россиялик генерал-лейтенант Игор Кириллов ва унинг ёрдамчиси Илья Поликарпов портлатиб юборилганди. Қотилликда гумонланиб, Ўзбекистон фуқароси Аҳмаджон Қурбонов ушланганди. Россия ФХХга кўра, терактни амалга оширган шахс бомбани электр самокатга ўрнатган. Ўзбекистон фуқароси кузатув учун каршеринг машинасини ижарага олиб, унга Wi-Fi камерасини улаган. Тасвирлар эса Днепропетровскдаги теракт ташкилотчиларига узатилгани маълум қилинган.
Таъкидланишича, генерал ва ёрдамчиси подъезддан чиқиши ҳақида видеосигнал олингандан сўнг, Украина разведкаси масофадан туриб бомбани ишга туширишга кўрсатма берган.
Изоҳ (0)