Буюк Британия ва Франция Украинадаги урушни тўхтатиш бўйича ўз режасини тайёрлаётган эди. Франция президенти Эммануэл Макрон унинг мазмунини ошкор қилди. Бу ҳақда Le Figaro хабар берди.
Мазкур режа тайёр бўлганидан сўнг АҚШ ҳукуматига ҳам тақдим этилади. режа Россия ва Украина ўртасида бир ой муддатга қисман сулҳ жорий этишни таклиф қилади. Бироқ бу қуруқликдаги жанговар ҳаракатларга тааллуқли бўлмайди. Франция президенти бунинг сабабини қуйидагича изоҳламоқда.
Ўт очиш тўхтатилган тақдирда, фронт бўйлаб унга риоя қилинаётганини текшириш жуда қийин бўлади, деди Макрон.
Сиёсатчининг сўзларига кўра, қисман ярашув ҳаво ва денгиз ҳужумларига, жумладан, энергетика объектларига зарба беришга тааллуқли бўлади.
Режанинг иккинчи қисмида Европа давлатлари Украинага тинчликпарвар контингент юбориши кўзда тутилган, аммо бу фақат кейинги босқичда содир бўлади.
Яқин ҳафталарда Украина тупроғида Европа қўшинлари бўлмайди. Гап шундаки, биз бу вақтдан қандай қилиб ўт очишни тўхтатишга, бир неча ҳафта давом этадиган музокараларга, сўнгра тинчлик имзолангандан кейин қўшинларни жойлаштиришга фойдаланимиш мумкин, деди Макрон.
Украина президенти Владимир Зеленский Лондонга ташрифи чоғида журналистларнинг бу режадан хабардормисиз, деган саволига шундай жавоб берди: “Мен ҳамма нарсадан хабардорман”.
Макрон Франция ва бошқа Европа давлатлари мудофаага кўпроқ пул сарфлаши кераклигини айтди.
Сўнгги уч йил давомида руслар мудофаага ЯИМнинг 10 фоизини сарфламоқда. Шунинг учун ялпи ички маҳсулотга нисбатан 3 ёки 3,5 фоизлик чегарани белгилаб, келажакка тайёргарлик кўришимиз керак. Бу Франция қийинчилик билан эришган ва Европанинг кўплаб давлатлари ҳали яқинлашмаган 2 фоиздан анча фарқ қилади, деди у.
Буюк Британия бош вазири Кир Стармер 2 март куни Буюк Британия, Франция, шунингдек, эҳтимол “яна бир ёки икки давлат” ҳарбий ҳаракатларни тўхтатиш режаси устида ишлашини айтди.
2 март куни Лондонда Россия-Украина урушини ҳал қилишга бағишланган саммит бўлиб ўтди. Унда Европа давлатлари, шунингдек, Туркия ва Канада етакчилари иштирок этди. Шунингдек, саммитда Украина президенти Володимир Зеленский ҳам қатнашди.
Зеленский ва АҚШ президенти Дональд Трамп ўртасида 28 февраль куни Вашингтондаги Оқ уйда жанжал келиб чиқди, шундан сўнг Украина раҳбаридан президент маъмурияти биносини тарк этишни сўрашди. Фойдали қазилмалар тўғрисидаги битимнинг белгиланган имзоланиши эса бекор қилинди.
Изоҳ (0)