Қирғизистон Россиянинг “С-300” зенит-ракета комплексларини олди. Бу ҳақда республика Хавфсизлик кенгаши котиби Марат Иманкуловга таяниб “Известия” хабар берди.
Бизда бирлашган ҳаво ҳужумидан мудофаа тизими ишлайди. Ҳозир бизга ушбу қўшма тизимнинг элементлари — “С-300” етиб келди. У Қирғизистон ҳудудида, деди Иманкулов ва Қирғизистон томони жами қанча комплекс олганига аниқлик киритмади.
Зенит-ракета комплексларини 8 май куни Бишкекда бўлиб ўтадиган Ғалабанинг 80 йиллигига бағишланган ҳарбий парадда намойиш этилиши мумкин. Уни етказиб бериш 2021 йилда Қирғизистон президенти Садир Жапаровнинг Россияга ташрифи чоғида келишилган эди.
2023 йил ноябрь ойида ҳаво ҳужумидан мудофаа ягона минтақавий тизимини яратиш тўғрисидаги битим кучга кирди. Икки томонлама келишув доирасида Россия коллектив хавфсизлик зонасида бирлашган ҳаво ҳужумидан мудофаа тизими қўшинларининг ҳаракатларини мувофиқлаштиради. Қирғизистон эса бу ҳаракатларни бошқаради. Қўшинлар ва техникани жойлаштириш учун Бишкекдан 20 километр узоқликда жойлашган Россиянинг Кант ҳарбий базаси ёнидан 5 гектар ер ажратилган.
“С-300” зенит-ракета комплекслари йирик саноат ва маъмурий объектлар, ҳарбий базалар ва бошқарув пунктларини душманнинг ҳаво-космик ҳужум воситалари зарбаларидан ҳимоя қилиш учун мўлжалланган. У баллистик ва аэродинамик нишонларга зарба беришга қодир.
Изоҳ (0)