Украина президенти Владимир Зеленский Киев босиб олинган ҳудудларни ҳеч қачон Россияники деб тан олмаслигини яна бир бор таъкидлади. Унинг сўзларига кўра, бу масала мамлакат учун “асосий қизил чизиқ” бўлиб қолади. Украиналиклар етакчиси бу ҳақда 12 март куни Жидда шаҳридаги АҚШ-Украина музокаралари муносабати билан ўтказилган брифингда маълум қилди.
Украиналиклар етакчиси мамлакат суверенитетини ҳимоя қилиш учун урушда кўплаб қурбонлар берилганини эслатди.
Биз Россия томонидан босиб олинган ҳеч қайси ҳудудни уларники деб тан олмаймиз. Бу – ҳақиқат. Халқимиз бунинг учун курашди, қаҳрамонларимиз ҳаётини фидо қилди. Жуда кўп инсон яраланди, жуда кўп азоб чекилди. Шу сабабли ҳеч ким буни унутмайди. Мен “ҳеч ким унутмайди” деганимда, бу биз учун асосий қизил чизиқ эканини назарда тутяпман, деди Зеленский.
АҚШ—Украина музокаралари
Саудия Арабистонида бўлиб ўтган учрашувдан сўнг Қўшма Штатлар Украинага ҳарбий ёрдам ва разведка маълумотлари алмашинувини тиклади. Шу билан бирга, Киев Вашингтон томонидан илгари сурилган 30 кунлик сулҳ таклифини қабул қилди. Мазкур муддат ичида томонлар урушни бутунлай тугатиш бўйича музокаралар олиб бориши кўзда тутилган.
Жидда шаҳрида илгари сурилган таклиф дунёнинг етакчи давлатлари томонидан ижобий қабул қилинди. Бироқ энди ҳамма Москванинг жавобини кутмоқда.
Россия президенти матбуот котиби Дмитрий Песковнинг маълум қилишича, Кремль мазкур таклиф тафсилотларини ўрганиши лозим.
АҚШ сенатори Россия вақтинчалик сулҳга рози бўлиб, музокаралар столига ўтириши лозимлигини, акс ҳолда мамлакатга қарши қўшимча санкциялар қўлланишини айтди.
Изоҳ (0)