Хитойдаги ресторанда 29 апрель куни юз берган ёнғин оқибатида 22 киши ҳалок бўлди. Бу ҳақда ABC News хабар берди.
Ҳодиса Лиаонинг провинциясининг Ляоянг шаҳридаги турар жой ҳудудида жойлашган ресторанда юз берган. Ёнғин оқибатида уч киши жиддий жароҳат олган. Ёнғин бинони қамраб олган, ҳодиса акс этган видеода қуюқ қора тутун бино устидан кўтарилганини кўриш мумкин. Ҳозирда ёнғин сабаблари номаълум.
Президент Си Цзиньпин ёнғин “катта йўқотишларга” олиб келганини ва ундан олинган сабоқлар “жуда жиддий” бўлганини айтган. У маҳаллий расмийларга ҳодиса сабабини тезда аниқлаш, қурбонларнинг оиласига ёрдам бериш, жабрланганларга тиббий ёрдам кўрсатиш ва айбдорларни жавобгарликка тортишни буюрган.
Хитойда бундай фожиалар кўпинча ёнғин хавфсизлиги қоидаларининг бузилиши туфайли юз беради. Жумладан, апрель ойи бошида шу сабаб билан мамлакатдаги қариялар уйида 20 киши ҳалок бўлганди.
2024 йил Хитойда газ сизиб чиқиши сабабли бир нечта жиддий портлашлар юз берганди. Масалан, март ойида Хебей провинциясидаги ресторанда рўй берган портлашда 2 киши ҳалок бўлган, 26 киши жароҳат олган. Сентябрда эса жанубдаги Шэньчжэнь шаҳридаги кўп қаватли бинода портлаш оқибатида 1 киши ҳалок бўлган.
Изоҳ (0)