Хитойнинг Евросиё масалалари бўйича махсус вакили Ли Хуэй Европа давлатларига “АҚШдан автономия” эълон қилишни, Украинада зудлик билан ўт очишни тўхтатишга чақиришни ва мамлакатнинг босиб олинган ҳудудларини Россияга “қолдиришни” таклиф қилди. Бу ҳақда музокаралардан хабардор бўлган ғарб расмийларига таяниб, The Wall Street Journal ёзмоқда.
Ли Хуэй май ойида Киев, Варшава, Берлин, Париж ва Брюсселга ташриф буюрди. Нашрнинг ёзишича, у Европа ҳукуматларини Хитойни Вашингтоннинг ўрнини босувчи иқтисодий давлат сифатида кўриб чиқишга чақирган ҳамда Россия ва Украина ўртасидаги можаро янада кенг тарқалмаслиги учун тезроқ ишга киришиш кераклигини айтган.
The Wall Street Journal суҳбатдошлари Хитойнинг Украинадаги вазиятни тартибга солиш бўйича саъй-ҳаракатларини “ҳисобдан чиқаришга ҳали эрта” эканини айтишди. Аммо улар Пекиннинг Москва билан қанчалик “яқин” боғланганини ҳисобга олиб, унинг “ҳалол воситачилик қилиш” қобилиятига шубҳа билдирди. Ғарб расмийлари Россия қўшинлари Украинани тарк этмагунча тинчлик ўрнатилиши мумкинлигига ишонмаслигини айтмоқда.
“Биз Россия қўшинлари олиб чиқилмаса, можарони музлатиш халқаро ҳамжамият манфаатига тўғри келмаслигини тушунтирдик”, — деди нашр суҳбатдошларидан бири. Европа расмийлари, шунингдек, Хитой элчисига “Европани Америкадан ажратиб бўлмаслигини” ва Европа Украинани қўллаб-қувватлаш йўлидан қайтмаслигини айтган.
“Улар Ғарбнинг бирлигини синаб, ташаббусни ўз қўлига олишга уринаётган бўлиши мумкин”, — деди Ли Хуэй билан суҳбатлашган дипломатлардан бири WSJ’га.
Бошқа бир дипломатнинг фикрича, Хитойнинг асосий манфаатлари Россия урушда ютқазмаслиги ва Москва ядро қуролидан фойдаланмаслиги ҳақида бўлиши мумкинлигини айтди.
26 май куни Ли Хуэй Россияга келди, у ерда Россия ташқи ишлар вазири Сергей Лавров билан музокаралар ўтказади.
Россиянинг Украинага кенг кўламли босқини бир йиллиги муносабати билан Хитой “Украина инқирозини сиёсий йўл билан ҳал қилиш” режасини тақдим этди. Унда бир томонлама санкцияларни рад этиш, Совуқ уруш менталитети ва тинчлик музокараларини бошлашга чақириш каби жами 12 банд бор. Украина президенти Владимир Зеленский буни тинчлик режаси эмас, балки Пекиннинг “фикрлари” деб атади.
26 апрель куни Хитой раҳбари Си Цзиньпин уруш бошидан бери Зеленский билан илк телефон мулоқотини ўтказди. Украина президентининг айтишича, Хитой раҳбари билан суҳбатда у Россия ва Украина ўртасида ҳудудий имтиёзлар ҳисобига сулҳ тузиб бўлмаслигини таъкидлаган.
Изоҳ (0)