Украина президентининг 13 март кунги мурожаатида айтишича, Владимир Путин Қўшма Штатлар томонидан илгари сурилган 30 кунлик сулҳ таклифини рад этишга тайёрланмоқда. Бироқ буни Дональд Трампга тўғридан тўғри айтишдан қўрқмоқда.
Владимир Зеленскийга кўра, Путиннинг сўзлари вақтни чўзишга ва реал ҳаракатлардан қочишга қаратилган навбатдаги манипуляциядир.
Ҳаммамиз Путиннинг кутилган ва манипулятив гапларини эшитдик. У ҳозирданоқ сулҳ таклифини рад этишга тайёрланмоқда. У урушни давом эттиришни ва украиналикларни ўлдиришни хоҳлайди, деди у.
Зеленскийнинг таъкидлашича, Путин бу ҳақда Трампга тўғридан тўғри айтишдан қўрқади. Шу сабаб Москва қабул қилиш имконсиз бўлган шартларни илгари сурмоқда.
“Кремль сулҳ таклифини шундай шартлар билан ўраб олмоқдаки, бу жараён барбод бўлиши ёки иложи борича узоқ чўзилиши керак. Путин бу усулни тез-тез қўллайди – у очиқ йўқ демайди, лекин жараённи чўзиб, муаммо ҳал этилишини имконсиз қилади. Биз буларнинг барчасини Россиянинг навбатдаги манипуляцияси деб биламиз, деди Зеленский.
Украина президенти, шунингдек, АҚШ томонидан илгари сурилган сулҳ таклифини ҳеч қандай шартсиз қабул қилганини таъкидлади.
Биз Америка томонидан сулҳ режимини жорий этиш ва назорат қилиш бўйича тайёрлик борлигини эшитдик. АҚШ ва Европанинг имкониятларини инобатга олсак, буни амалга ошириш мумкин. Сулҳ амал қилаётган пайтда узоқ муддатли хавфсизлик ва доимий тинчлик бўйича барча саволларга жавоб тайёрлаш ва урушни тугатиш режасини ишлаб чиқиш мумкин бўлади. Украина бу жараёнда иложи борича тез ва конструктив ишлашга тайёр, дея таъкидлади Зеленский.
Унинг сўзларига кўра, ушбу позиция АҚШ вакилларига, Европа ҳамкорларига ва барча иттифоқчиларга етказилган.
Биз жараённи мураккаблаштирадиган ҳеч қандай шарт қўймаяпмиз – буни Россия қилмоқда. Биз ҳар доим айтганмизки, жараённи чўзаётган ягона томон – бу Россия. Уларга уруш керак. Путин тинчлик йилларини ўғирлади ва урушни ҳануз давом эттирмоқда. Энди унга босимни кучайтириш ва натижа берадиган санкциялар жорий қилиш вақти келди, деди Зеленский.
Украинада тинчлик
Украина урушини тугатиш бўйича дастлабки қадамлар Саудия Арабистонида қўйилди. АҚШ–Украина делегациялари Жидда шаҳрида учрашиб, тинчлик шартларини муҳокама қилди. Музокаралар давомида Вашингтон 30 кунлик сулҳ таклифини илгари сурди. Мазкур ташаббус Киев ва Европа пойтахтлари томонидан ижобий қабул қилинди.
Бироқ Россия президентининг халқаро масалалар бўйича ёрдамчиси Юрий Ушаков Оқ уй таклифини “Украина ҳарбийлари учун вақтинчалик нафас олиш имконияти” деб атаб, “Москва вақтинчалик сулҳ эмас, узоқ муддатли келишув хоҳлаши”ни айтди.
Владимир Путиннинг ўзи эса “ҳарбий ҳаракатларни тўхтатиш”га баъзи шартлар билан розилигини таъкидлади.
Москва Украина томони вақтинчалик сулҳдан сафарбарлик ўтказиш, ҳарбий тайёргарлик учун фойдаланмаслиги ҳамда иттифоқчиларидан қурол олмаслигини талаб қилмоқда.
Бу орада Дональд Трампнинг махсус вакили Стив Виткофф музокара ўтказиш учун Москвага келди. У Россия президенти билан тинчлик шартларини ёпиқ эшиклар ортида муҳокама қилиши мумкин.
Изоҳ (0)