АҚШ президенти Дональд Трамп Америка расмийлари Россия расмийлари билан Украинада ўт очишни тўхтатишни муҳокама қилиш учун Москвага йўл олганини маълум қилди. Бу ҳақда BBC хабар бермоқда.
11 март куни Украина томони Саудия Арабистонидаги музокаралар натижасида 30 кунлик ўт очишни тўхтатишга рози бўлган эди. Учрашувдан сўнг Украина президенти Владимир Зеленский энди АҚШ Россияни сулҳ таклифига рози бўлишга кўндириши кераклигини айтди. Россия томони эса масалани ўрганаётганини маълум қилган. Яқин орада Трамп ва Путин ўртасида телефон орқали мулоқот бўлиши мумкин.
Дональд Трамп овал кабинетда журналистлар билан суҳбатлашаётиб, ўт очишни тўхтатиш имконияти ҳақида “ижобий сигналлар” олганини маълум қилди. “Бироқ ижобий сигналлар ҳеч нарсани англатмайди. Бу жуда жиддий вазият” , деди у.
Трампнинг сўзларига кўра, агар Россия урушни давом эттиришга қарор қилса, унга қарши “ҳалокатли” санкциялар киритилиши мумкин.
Молиявий жиҳатдан унчалик ёқимли бўлмаган, аммо менинг қўлимдан келадиган ишлар бор. Бу Россия учун жуда ёмон оқибатларга олиб келади. Мен бундай қилишни хоҳламайман, чунки мен тинчликка эришишни истайман, деди Трамп.
Шунингдек, у Украина томонининг ўз позициясини ўзгартиргани ҳақида гапирди.
Зеленский тинчликни хоҳламайдиган одам эди. Энди у ҳам тинчликка рози бўлди. Шундай экан, буёғини кўрамиз, дея қўшимча қилди АҚШ президенти.
Трамп Москвага айнан қайси расмийлар бораётганига аниқлик киритмаган.
Шу ҳафта бошида BBC манбаси Трампнинг Яқин Шарқ бўйича махсус вакили Стив Уиткофф Жиддадаги учрашувдан кейин Россия пойтахтига бориши ҳақида хабар берганди. Оқ уй 12 март куни бу хабарни тасдиқлади.
Оқ уй матбуот котиби Керолайн Ливиттнинг маълум қилишича, миллий хавфсизлик бўйича маслаҳатчи Майк Уолц “россиялик ҳамкасби” билан телефон орқали мулоқот қилган. Уолц ҳам айнан ким билан гаплашганига аниқлик киритмаган.
Нима учун Киев АҚШ таклифига тезда рози бўлди?
BBCънинг хавфсизлик масалалари бўйича мухбири Фрэнк Гарднерга кўра,“Украинада ўт очишни тўхтатиш эстафетаси Жиддадан Вашингтон ва Москвага ўтар экан, гап ҳам “оптика” ҳақида, яъни вазият қандай кўриниши ва одамлар уни қандай кўришни хоҳлаши тўғрисида, ҳам фронтдаги ҳақиқий аҳвол ҳақида кетмоқда.
“Украина раҳбарияти дўстларидан маслаҳатлар олмоқда. Улар орасида Буюк Британия бош вазирининг миллий хавфсизлик бўйича маслаҳатчиси Жонатан Пауэлл ҳам бор, деган маълумотлар мавжуд. Уларнинг Киевга етказаётган хабари аниқ: “Бу сизга ёқадими йўқми, лекин Оқ уй билан муносабатларни яхшилашингиз шарт. Шу боис президент Зеленский урушнинг тугашига ҳали узоқ вақт борлигини айтмай қўйди. Бу эса урушнинг дарҳол тугашини истаётган президент Трампни ғазаблантирмаслиги керак.
Шунинг учун Украина Америка музокаралар гуруҳининг 30 кунлик тўлиқ ўт очишни тўхтатиш таклифига тезда рози бўлди. Бу Украинага ўзини халқаро майдонда худди америкаликлар сингари тинчликка интилувчи томон сифатида кўрсатиш имконини беради”, деди Гарднер.
АҚШ сенатори Линдси Грем Россия 30 кунлик ўт очишни тўхтатишга рози бўлиши кераклигини, акс ҳолда унга қўшимча санкциялар қўллаш мумкинлигини айтганди. У “нафақат Россияга таъсир кўрсатадиган, балки Россия товарларини, хусусан, нефть, газ ва уранни сотиб олувчи мамлакатларга нисбатан санкциялар ва божлар жорий этадиган” Конгресс томонидан кўзда тутилган санкцияларни жорий этишига ишонч билдирган.
“Россия Украинага қўпол бостириб кириши натижасида аллақачон енгиб бўлмас иқтисодий оғриқни ҳис қилиши керак эди”, дея қўшимча қилди у.
Маълумот учун, Саудияда АҚШ—Украина делегациялари ўртасидаги учрашув 9 соат давом этди. Якунда Украина 30 кунлик ўт очишни тўхтатиш таклифини қабул қилган, лекин аввал Россия рози бўлиши кераклиги айтилганди.
Кремль Жиддада АҚШ ва Украина ўртасидаги музокараларда илгари сурилган таклифларни ўрганаётганлигини ва Вашингтон Москвага учрашув тафсилотлари ҳақида ахборот беришига умид қилинаётганлиги маълум қилинганди.
Изоҳ (0)