Rossiya Federatsiyasi prezidenti Vladimir Putin bilan AQSH prezidentining maxsus vakili Stiv Uitkoff o‘rtasidagi uchrashuvda Rossiya va Ukraina o‘rtasidagi to‘g‘ridan-to‘g‘ri muzokaralarni qayta boshlash imkoniyati muhokama qilindi. Bu haqda Rossiya rahbarining yordamchisi Yuriy Ushakov ma’lum qildi.
Ushakovning aniqlik kiritishicha, Putin va Uitkoff o‘rtasidagi suhbat Rossiya va AQSHning nafaqat Ukraina, balki boshqa bir qator masalalar bo‘yicha pozitsiyalarini yaqinlashtirgan. Uning so‘zlariga ko‘ra, uchrashuvda, xususan, Moskva va Kiyev vakillari o‘rtasida to‘g‘ridan-to‘g‘ri muzokaralarni qayta tiklash imkoniyati muhokama qilingan.
“Rossiya va AQSH prezidentlari o‘rtasida erishilgan kelishuvga muvofiq, turli darajadagi samarali Rossiya-Amerika muloqoti bundan keyin ham eng faol rejimda amalga oshiriladi”, dedi Ushakov.
Putin va Uitkoff uchrashuvi 25-aprel kuni Moskva vaqti bilan soat 14:30da boshlangan. Muzokaralarda Rossiya to‘g‘ridan-to‘g‘ri investitsiyalar jamg‘armasi (RFPI) rahbari, Rossiya Federatsiyasi prezidentining maxsus vakili Kirill Dmitriyev va Ushakov ham ishtirok etgan.
“Uch soatlik suhbat bo‘lib o‘tdi. U konstruktiv va juda foydali xususiyatga ega bo‘ldi. Bu suhbat Rossiya va AQSH pozitsiyalarini nafaqat Ukraina masalasida, balki bir qator boshqa xalqaro masalalarda ham yanada yaqinlashtirishga imkon berdi”, dedi Ushakov.
Bu Uitkoffning so‘nggi uch oy ichida Rossiyaga to‘rtinchi tashrifi va AQSH prezidentining maxsus vakili va Putin o‘rtasidagi uchinchi uchrashuv hisoblanadi.
11-aprel kuni Sankt-Peterburgda bo‘lib o‘tgan uchrashuvda Uitkoff va Putin Ukrainadagi mojaroni hal qilish masalalarini muhokama qilgan edi. O‘shanda Rossiya prezidenti AQSHdan doimiy tinchlikni ta’minlashni so‘ragandi.
18-aprel kuni AQSH prezidenti Donald Tramp agar mojaro tomonlaridan biri muzokaralarni ataylab qiyinlashtirsa, Vashington Ukraina bo‘yicha tinchlik jarayonida ishtirok etishni to‘xtatishi haqida ogohlantirdi. 22-aprel kuni Tramp mojaroni hal qilish bo‘yicha o‘z muddatlari borligini, muddat tugagach, bu boradagi pozitsiyasini qayta ko‘rib chiqishini aytdi. Shu bilan birga, AQSH prezidenti Rossiya va Ukraina o‘rtasida tinchlik kelishuviga erishish uchun yaxshi imkoniyat bor deb hisoblaydi.
New York Post xabariga ko‘ra, Tramp uch kun ichida Ukrainadagi vaziyatni hal qilish bo‘yicha tinchlik rejasini taqdim etishi mumkin. Gazetaning AQSH ma’muriyatidagi manbasining aniqlik kiritishicha, reja Yevropa tinchlikparvar kuchlarini Ukraina hududiga joylashtirishni o‘z ichiga olishi mumkin. Bundan tashqari, o‘t ochishni to‘xtatishga rioya etilishini kuzatish uchun alohida tinchlikparvar kuchlarni tashkil etish imkoniyati muhokama qilinmoqda.
Izoh (0)