АҚШ президенти Дональд Трамп Украинанинг НАТОга интилиши Россия билан можаро келтириб чиқарганини, Қрим Украинадаги можарони ҳал қилиш бўйича келишув доирасида Россия таркибида қолишини билдирди. Бу ҳақда у Оқ уй раҳбари лавозимидаги дастлабки 100 кунлик фаолияти якунлари бўйича Time журналига берган интервьюсида айтиб ўтди.
Трамп Украинанинг НАТОга аъзо бўлиш имконияти йўқлигини айтиб, Украинанинг альянсга аъзо бўлиш истиқболлари масаласи можаронинг келиб чиқишига сабаб бўлганини қўшимча қилди.
“Менимча, улар (Украина) ҳеч қачон НАТОга қўшила олмайди. Урушнинг бошланишига улар НАТОга қўшилиш ҳақида гапира бошлагани сабаб бўлган деб ўйлайман”, дея жавоб берди Трамп Украинанинг альянсга қўшилишига умид бор-йўқлиги ҳақидаги саволга.
Унинг таъкидлашича, агар Украинанинг альянсга қўшилиши мавзуси муҳокама қилинмаганида, эҳтимол, Украинадаги можаронинг олдини олиш имконияти кўпроқ бўларди.
“Агар бу масала кўтарилмаганда, можаронинг умуман бошланмаслиги эҳтимоли анча юқори бўларди”, деди Америка раҳбари.
Трамп суҳбат давомида Украинадаги инқироз ҳал этилгандан сўнг ҳам Қрим Россия Федерацияси таркибида қолишини айтган.
“Биз Қрим ҳақида гаплашишга мажбурмиз, чунки у доим тилга олинади. Қрим Россия билан қолади. Украина президенти Владимир Зеленский ҳам, бошқалар ҳам буни тушунади ва Қрим узоқ вақтдан бери Россия билан бирга эканлигини билишади”, дея изоҳ берди у.
Бундан ташқари, Трамп Украина инқирозини фақат у ҳал қила олишини таъкидлаб, келишувга тез орада эришиш мумкинлигини айтган.
“Биз самарали музокаралар олиб бордик ва битимга жуда яқинлашдик. Мен бошқа ҳеч ким бундай битимга эриша олмаслигига ишонаман”, деди АҚШ президенти.
Суҳбат давомида Трамп Украинада тинч йўл билан келишувга фақат у эриша олишини таъкидлаган.
“Менимча, музокара орқали тинчликка эриша оладиган ягона шахс менман... Бу келишувни бошқа бирор киши тузиши мумкинлигига ишонмайман”, дея баён қилди Трамп.
Изоҳ (0)