Франция учун асосий устувор вазифа — бу Россияга хавфсизлик кафолатларини бериш эмас, балки Украинани ҳимоя қилиш, деди президент Эммануэль Макрон Le Monde нашрига берган интервьюсида.
Москва ва Киев ўртасидаги потенциал тинчлик шартномасининг Россияга хавфсизлик кафолатлари бериш банди ҳақидаги саволга Макрон «Бу устувор мақсад эмас. Бу вақт ўтиши билан пайдо бўладиган нарсалардан бири» деб жавоб қайтарди.
Макроннинг фикрича, Россия ҳозир сулҳга тайёр эмас. «Россия бошиданоқ сўраган нарса тинчлик эмас, таслим қилиш эди», — деди Франция раҳбари. «Париж эса Украина ғалабасига, Украинани мутлақ ҳимоя қилиш стратегиясига амал қилади».
2021 йил охирида Россия хавфсизлик кафолати лойиҳасини тайёрлаб, АҚШ ва НАТОга ўз таклифларини тақдим этган эди. Ҳужжатда, хусусан, собиқ СССР давлатларини альянсга қабул қилмаслик ва уларнинг ҳудудида ҳарбий базаларни жойлаштирмаслик сўралган. Вашингтон ва Шимолий Атлантика альянси билан кафолатлар бўйича олиб борилган музокаралар аниқ натижа бермади. 24 февраль куни эса Россия Украинага қарши уруш бошлади.
Можаро бошида Россия ва Украина делегациялари музокаралар олиб борди, бироқ баҳорда улар музлатиб қўйилди. Москва Киевни мулоқотга чақирмоқда, аммо Украина президенти Владимир Зеленский Россия томони тинчликни эмас, балки «қисқа муддатли сулҳ», ўзини тиклаб олиш учун муҳлат истаяпти, деб ҳисобламоқда.
Декабрь ойи бошида Макрон Украинадаги уруш тугаганидан сўнг Европа янгиланган хавфсизлик архитектурасини қуриши кераклигини, бу жумладан, Россия учун кафолатлар беришни ҳам ўз ичига олишини айтганди. Макроннинг бундай баёнотидан сўнг Болтиқбўйи мамлакатлари ва Европа Иттифоқининг бошқа давлатлари расмий норозилик эълон қилди. Reuters маълумотларига кўра, Латвия, Литва, Эстония, Словакия ва Польша расман Париж позициясига қарши чиққан.
Изоҳ (0)