Украина президенти Владимир Зеленский АҚШ президенти Дональд Трамп билан Овал офисда юз берган баҳс учун узр сўраган. Бу ҳақда Оқ уйнинг Яқин Шарқ бўйича махсус вакили Стив Виткофф 10 март куни Fox News телеканалига берган интервьюсида маълум қилди.
Виткоффнинг таъкидлашича, бугун Саудия Арабистонида бўлиб ўтаётган АҚШ—Украина музокаралари ҳар икки давлат учун Оқ уйдаги баҳсдан сўнг биринчи юқори даражадаги учрашув бўлади.
“Зеленский президентга мактуб йўллади ва Оқ уйда содир бўлган ҳодиса учун узр сўради. Бу муҳим қадам эди,” деди Стив Виткофф.
28 февраль куни Оқ уйда Зеленский ва Трамп ўртасида кескин баҳс юзага келганидан сўнг, Оқ уй вакили Зеленскийдан расман узр сўрашни талаб қилган эди. 4 март куни Зеленский воқеани “афсусланарли” деб атаган ва Трампнинг “кучли етакчилиги остида” тинчлик йўлида ишлашга тайёрлигини билдирган эди.
Бироқ Виткофф ушбу баёнотни расмий узр сифатида қабул қилганми ёки Зеленский Трампга дипломатик каналлар орқали алоҳида мактуб йўллаганми, бу борада аниқ маълумот йўқ.
Виткофф, шунингдек, Оқ уйда юз берган баҳсдан бери АҚШ, Украина ва Европа расмийлари ўртасида доимий музокаралар олиб борилаётганини айтди. У Саудия Арабистонидаги учрашув Украина минерал ресурслари бўйича тўхтаб қолган келишувни жонлантириши мумкинлигига умид билдирди.
“Мен буни прогресс деб атаган бўлардим... Умид қиламанки, келишув имзоланади,” деди Виткофф.
Унинг сўзларига кўра, музокараларда Украина хавфсизлиги бўйича протоколлар асосий муҳокама мавзуларидан бири бўлади.
“Бу мураккаб масалалар эмас, фақат очиқ-ойдин муҳокама қилиниши керак,” дея қўшимча қилди Виткофф.
Оқ уйда юз берган баҳсдан сўнг АҚШ ва Украина ўртасидаги муносабатлар кескин ёмонлашди. Вашингтон Киевга ҳарбий ёрдамни тўхтатди ва муҳим разведка маълумотларини улашишни тўхтатди. Бироқ Виткофф интервью давомида АҚШ мудофаа мақсадлари учун зарур бўлган разведка маълумотларини узатиш тўхтамаганини таъкидлади.
Ҳарбий ёрдамнинг тўхтатилиши Трампнинг ўз партиясидаги айрим сиёсатчилар томонидан ҳам танқид қилинди. Республикачи сенатор Линдси Грем Оқ уйнинг қарори “Афғонистондаги вазиятдан ҳам ёмонроқ оқибатларга олиб киши мумкин” деб огоҳлантирди.
АҚШ давлат котиби Марко Рубио эса агар Саудия Арабистонидаги музокаралар муваффақиятли ўца, Вашингтон Киевга ҳарбий ёрдамни тиклаши мумкинлигини маълум қилди. Бироқ унинг нутқида Украина Россия билан сулҳ учун айрим ҳудудларидан кечишу мумкинлигига шама бор.
Изоҳ (0)