AQSH va Isroil qo‘llab-quvvatlaydigan maxsus tashkil etilgan G‘azoga gumanitar yordam xususiy jamg‘armasi (GHF) 26-may kuni Falastin anklaviga yordam yetkazishni boshlaydi. Hafta oxirigacha u 1 million kishini qamrab olishni rejalashtirmoqda. Bu haqda The Times of Israel nashri xabar bermoqda.
“Yuk mashinalarimiz yuklangan va jo‘natishga tayyor. 26-may dushanba kunidan boshlab GHF G‘azoga to‘g‘ridan-to‘g‘ri yordam yetkazishni boshlaydi, bu hafta oxirigacha 1 milliondan ortiq falastinlikni qamrab oladi. Keyingi haftalarda G‘azoning barcha aholisiga yordam ko‘rsatishni boshlash uchun faoliyatimizni tezda kengaytirishni rejalashtirmoqdamiz”, deyiladi GHF bayonotida.
Shuningdek, jamg‘arma uni tashkil etishga qarshi bo‘lganlarni tanqid qilib, ularni “hal qilib bo‘lmaydigan muammolarga ijodiy yechimlar toppish”ga to‘sqinlik qilishda ayblagan.
Ta`kidlanishicha, Isroil AQSH ko‘magida G‘azo sektori aholisiga yordam ko‘rsatishning yangi tizimini joriy etmoqchi, bu GHFga taqsimlash markazlarini tashkil etish va oziq-ovqat to‘plamlari hamda boshqa zarur tovarlarni tarqatish bo‘yicha amalda monopol huquqlarni berishni nazarda tutadi. Anklavda yordam ko‘rsatish bilan shug‘ullanayotgan barcha xalqaro tashkilotlar, shu jumladan BMT qoshidagi tashkilotlar, rejaga ko‘ra, bundan buyon buni faqat jamg‘arma orqali amalga oshirishlari mumkin bo‘ladi.
Isroil hukumati GHF to‘liq ishlay boshlagunga qadar BMT tuzilmalari va boshqa tashkilotlar o‘tish davrida eski tizim bo‘yicha ishlashni davom ettirishlari mumkinligini ta’kidladi.
Ilgariroq GHF orqali yordamni taqsimlashni monopollashtirish rejasi G‘azoda tarixan faoliyat yuritgan aksariyat xalqaro tashkilotlar, jumladan, BMT tomonidan tanqid qilingan edi. Tanqidning asosiy nuqtasi - taqsimlash markazlarini G‘azo janubidagi jangovar harakatlardan xoli “xavfsizlik hududlari”ga joylashtirish niyati, bu esa, tanqidchilarning fikricha, anklav aholisining majburiy ko‘chirilishiga olib kelishi mumkin. Shuningdek, BMT Isroilning gumanitar yordamni siyosiylashtirishi va uni falastinliklarga bosim o‘tkazish vositasiga aylantirishi mumkinligidan xavotirda.
Britaniyaning Financial Times gazetasi ma’lumotlariga ko‘ra, GHF so‘nggi haftada tanqidiy fikrlarni inobatga olgan va Isroil rahbariyatidan G‘azo shimolida ham tarqatish markazlarini ochishni talab qilgan, ammo bu talab qondiriladimi yoki yo‘qmi noma’lum.
Jahon sog‘liqni saqlash tashkiloti G‘azo sektoridagi barcha shifoxonalarning kamida 94 foizi shikastlangan yoki vayron etilgan, Falastin anklavi shimolida yashovchilar deyarli har qanday tibbiy yordam olish imkoniyatidan mahrum bo‘lgani bildirgandi.
20-may kuni Buyuk Britaniya Isroil armiyasining G‘azo sektoridagi yangi operatsiyasi sababli Isroil bilan erkin savdo bitimini tuzish bo‘yicha muzokaralarni to‘xtatdi.
Izoh (0)