AQSH prezidenti Donald Tramp Garvard universitetida tahsil olayotgan chet ellik talabalarning maʼlumotini so‘radi. U Truth Social ijtimoiy tarmog‘iga tegishli postni joylashtirdi.
Nima uchun Garvard o‘z talabalarining deyarli 31 foizi chet ellik ekanini aytmayapti? Ularning ba’zilari AQSH bilan do‘stona munosabatda bo‘lmagan mamlakatlardan bo‘lishiga qaramay, bu davlatlar o‘z fuqarolari ta’limi uchun hech qanday mablag‘ ajratmaydi va ajratishni ham o‘ylamaydi. Buni bizga hech kim aytmagan!
Biz Garvardga milliardlab dollar berayotganimiz sababli o‘sha chet ellik talabalarning kimligini va qaysi mamlakatlardan ekanini bilishni istaymiz.
AQSH prezidenti bu o‘rinli talab ekani, biroq Garvard universiteti bu maʼlumotlarni ochiqlashga shoshilmayotganini aytdi.
Biz o‘sha talabalarning ismlari va kelib chiqqan mamlakatlarini bilmoqchimiz. Garvardning 52 million dollari bor, shuni sarflasin va Federal hukumatdan grant ajratishni davom ettirishini so‘rashni bas qilsin!, dedi Tramp.
Aprel oyida Garvard universiteti professorlari Tramp ma’muriyatini federal moliyalashtirishni tekshirish bilan tahdid qilgani uchun sudga bergandi. Keyinroq Tramp ma’muriyati Garvard uchun 2,2 mlrd dollarlik grantlarni muzlatib qo‘ydi.
22-may kuni AQSH ichki xavfsizlik vaziri Kristi Noem Garvard universiteti endi xorijiy talabalarni qabul qilish huquqidan mahrum etilishini aytdi. U hozirda Garvardda tahsil olayotgan barcha xorijliklar boshqa oliygohlarga o‘tishi kerakligini taʼkidladi.
Vazir taxminiga ko‘ra, Garvard talabalarining chorak qismidan ko‘prog‘i yangi universitet qidirishga majbur bo‘ladi. Tramp boshqa universitetlar uchun ham xorijiy talabalarni qabul qilishga taqiq joriy qilinishi mumkinligini aytdi.
Ma’muriyat Garvardni zo‘ravonlikni va antisemitizmni qo‘zg‘atish hamda Xitoy Kommunistik partiyasi bilan aloqalar o‘rnatishda aybdor deb hisoblaydi, dedi Kristi Noem.
23-may kuni AQSHdagi sud Garvardga nisbatan qo‘yilgan xorijiy talabalarni qabul qilish taqiqini vaqtincha to‘xtatib turdi. Garvard universiteti Tramp ma’muriyatiga qarshi 10 banddan iborat da’vo arizasi kiritdi. Ular orasida ma’muriy tartib-qoidalar to‘g‘risidagi qonun (APA) hamda AQSH konstitutsiyasining so‘z va yig‘ilish erkinligi haqidagi birinchi tuzatishi buzilishi mavjud.
Avvalroq Oq uy AQSH universitetlaridan yahudiy millatiga mansub talabalarni himoya qilishni talab qilgan va bunga amal qilinmasa, moliyaviy yordamni qisqartirish bilan tahdid qilgandi.
AQSH oliy ta’lim muassasalarida Isroilga qarshi norozilik namoyishlari davom etmoqda. Namoyishlar G‘azoga uyushtirilgan hujumlar, oqibatda tinch aholi orasida qurbonlar soni ortib borishi, gumanitar vaziyat og‘irlashgani, AQSHning Isroilga qurollar sotayotgani bilan bog‘liq.
Izoh (0)