AQSH prezidenti Donald Tramp energetikaga boy uchta Fors ko‘rfazi davlatlari — Saudiya, Qatar va Birlashgan Arab Amirliklariga shu hafta tashrif buyurishi kutilmoqda. Bu haqda CNN xabar berdi.
Prezident 13-may kuni Saudiya Arabistoniga, so‘ngra Qatarga, keyin esa Birlashgan Arab Amirliklariga tashrif buyuradi. Safar 16-maygacha davom etishi kutilmoqda.
Ushbu davlatlar AQSH prezidenti bilan ijobiy shaxsiy aloqalarni o‘rnatgan. Ular G‘azo, Ukraina va Eron masalalarini hal qilishda o‘zlarini asosiy vositachi sifatida ko‘rsatib, AQSHga trillionlab sarmoya kiritishga va’da bermoqda.
“Tramp Fors ko‘rfazi davlatlaridan ancha foyda ko‘radi. Ular AQSH iqtisodiyotiga trillionlab sarmoya kiritishga va Amerika qurol tizimlariga ulkan mablag‘ sarflashga va’da berishmoqda”, dedi Bahrayndagi Xalqaro strategik tadqiqotlar instituti Yaqin Sharq siyosati bo‘yicha katta ilmiy xodimi Hasan Alhasan.
CNN’ning ta’kidlashicha, Fors ko‘rfazi davlatlari Trampga “xushomad qilish” bilan AQSHning xavfsizlik va iqtisodiyot sohalarida o‘z pozitsiyalarini mustahkamlashni rejalashtirgan.
Tramp prezidentlikka qaytganidan beri Fors ko‘rfazi davlatlari bilan munosabatlar sezilarli darajada yaxshilandi. Bayden ma’muriyati davrida hafsalasi pir bo‘lgan Saudiya Arabistoni va BAA harbiy, texnologik va iqtisodiy aloqalarni diversifikatsiya qilishga intilgan.
Hozir dunyoning eng qudratli davlati bilan aloqalarni mustahkamlashning ayni vaqti, dedi Abu Dabidagi Emirates Policy Center tahlil markazi asoschisi va prezidenti Ebtesam AlKetbi.
2024-yili AQSH va Saudiya Arabistoni muhim mudofaa va savdo paktini imzolamoqchi bo‘ldi, biroq Saudiyaning Isroil haqidagi fikrlari kelishuvga to‘sqinlik qildi. Qolgan 2 davlat ham tarixda shunga o‘xshash muammolarga duch kelgan.
Trampning tashrifi bu uch davlat va Qo‘shma Shtatlar uchun foydali bo‘lgan yangi kelishuvlar imzolanishiga turtki bo‘lishi kutilmoqda.
Izoh (0)