AQSH prezidenti Donald Tramp G‘azo sektoridagi garovdagilarning barini ozod qilishni talab qilganidan so‘ng HAMAS vakili bunga javob qaytardi. Bu haqda Al Arabiya xabar berdi.
HAMASga ko‘ra, bunday tahdidlar Isroil bosh vaziri Binyamin Netanyaxuning G‘azoda o‘t ochishni to‘xtatish rejimidan chiqishini va qamalni kuchaytirishini qo‘llab-quvvatlashni anglatadi.
Tramp 5-mart kuni HAMASdan “barcha garovga olinganlarni, jumladan, halok bo‘lgan garovdagilar jasadini “keyinroq emas, hoziroq ozod qilishni” talab qildi.
Qolgan isroillik mahbuslarni ozod qilishning eng samarali yo‘li — kelishuvning ikkinchi bosqichiga o‘tish va vositachilar homiyligida imzolangan kelishuvga rioya qilishga majburlashdir, deydi HAMAS vakili Abdul-Latif al-Qanua.
Yanvar oyida kuchga kirgan G‘azodagi tinchlik kelishuvi Trampning elchisi va iste’foga chiqayotgan Bayden ma’muriyati vakillari ishtirokida muhokama qilindi. Kelishuvga ko‘ra, qolgan garovdagilar ikkinchi bosqichda ozod etilishi, shu paytda urushni yakunlash bo‘yicha so‘nggi rejalar ishlab chiqilishi kerak.
Tinchlik kelishuvining birinchi bosqichi 2-mart kuni yakunlandi. Shundan so‘ng Isroil G‘azoga gumanitar yordam kirishini to‘liq taqiqladi. HAMASdan urushni tugatish bo‘yicha muzokaralarni boshlamasdan turib, qolgan garovdagilarni ozod qilishni talab qildi. Taqiq G‘azo vayronalarida yashovchi 2,3 million aholi orasida ocharchilikka olib kelishi mumkin.
AQSH prezidenti tahdidi
Tramp garovga olinganlar ozod etilmasa, bu HAMASga qimmatga tushishini aytgan.
Tanlov sizning qo‘lingizda. Barcha garovdagilarni hoziroq, kechiktirmasdan ozod qiling va o‘ldirilgan odamlarning jasadlarini darhol qaytarib bering, aks holda sizga juda yomon bo‘ladi. Men Isroilga ishni yakunlash uchun kerak bo‘lgan hamma narsani yubormoqdaman.
Agar aytganimni qilmasangiz, HAMASning birorta a’zosi ham omon qolmaydi. Men hozirgina siz hayotini izdan chiqargan sobiq garovdagilar bilan uchrashib keldim. Bu sizga oxirgi ogohlantirish! Rahbariyat uchun endi G‘azoni tark etish vaqti keldi, hali imkoniyatingiz bor. G‘azo xalqiga esa: sizni ajoyib kelajak kutmoqda, lekin garovdagilarni ushlab tursangiz, bu sizga nasib etmaydi, deya tahdid qildi u.
Ma’lumot o‘rnida, Tramp 42 kun ichida Isroilga 12 mlrd dollarlik harbiy yordam yubordi. AQSH prezidenti xorijiy yordam dasturlarini moliyalashtirishni to‘xtatgani fonida Isroilga yordam ko‘rsatishda davom etmoqda. 3-mart kuni Tramp Ukrainaga har qanday yordamni to‘xtatgan edi.
Izoh (0)