Rossiya qo‘shinlari 25-mayga o‘tar kechasi Ukrainaga dronlar va raketalar bilan eng yirik aviazarbani amalga oshirdi. Mazkur aviahujumga 298 ta dron jalb etildi. AQSH prezidenti Donald Tramp bunga munosabat bildirib, rossiyalik hamkasbi Vladimir Putinni keskin tanqid qildi.
Men har doim Vladimir Putin bilan juda yaxshi munosabatda bo‘lganman, lekin unga nimadir bo‘lgan. U butunlay aqldan ozibdi! U bekordan bekorga ko‘p odamlarni o‘ldiryapti, men faqat harbiylar haqida gapirayotganim yo‘q. Raketalar va dronlar hech qanday sababsiz Ukraina shaharlari bo‘ylab uchirilmoqda, dedi Tramp.
AQSH rahbari Putin butun Ukrainani bosib olmoqchi ekani, biroq bu “Rossiyaning qulashiga olib kelishi”ni ta’kidladi. Tramp o‘z bayonotida ukrainalik hamkasbi Vladimir Zelenskiyni ham tanqid qildi.
Xuddi shunday, prezident Zelenskiy ham o‘z so‘zlari bilan mamlakatiga hech qanday foyda keltirmayapti. Uning og‘zidan chiqqan har bir so‘z muammo keltirib chiqaradi, bu menga yoqmaydi va to‘xtashi kerak. Agar men prezident bo‘lganimda, bu urush hech qachon boshlanmagan bo‘lardi. Bu Zelenskiy, Putin va Baydenning urushi, Trampniki emas. Men faqat qo‘pol layoqatsizlik va adovat tufayli kelib chiqqan katta va dahshatli yong‘inlarni o‘chirishga yordam beryapman, xolos, dedi Tramp.
Rossiya qo‘shinlari 25-mayga o‘tar kechasi Ukraina hududiga 300 ga yaqin dron va 70 ta raketa uchirdi. Oqibatda 12 kishi halok bo‘ldi, 60 dan ortiq kishi yaralandi. 13 ta hudud zarba ostida qolgan: Kiyev va Kiyev viloyati, shuningdek, Jitomir, Xmelnitskiy, Ternopol, Dnepropetrovsk, Nikolayev, Odessa, Xarkov, Chernigov, Cherkass, Sumi va Poltava viloyatlari.
Izoh (0)