Isroil Eron yadroviy obyektlariga zarba berish uchun tayyorgarlik ko‘rmoqda. Bu haqda razvedka ma’lumotlari bilan tanish bo‘lgan AQSH rasmiylariga tayanib CNN xabar berdi.
Isroil rasmiylari hujum uchun yakuniy qaror qabul qilganmi yoki yo‘qmi, noma’lum. Oq uy ham yahudiy davlatining rejalari borasida umumiy qarashga ega emas. Isroilning harakatlari AQSH va Eron o‘rtasidagi yadroviy muzokaralarining kechishiga bog‘liq bo‘lishi kutilmoqda.
Isroilning Eron yadroviy inshootiga zarba berish ehtimoli so‘nggi oylarda sezilarli darajada oshgan, deydi razvedka bilan tanish mulozim.
Uning so‘zlariga ko‘ra, Vashington va Tehron o‘rtasidagi uranni boyitishdan voz kechilmaydigan kelishuv ehtimoli “zarba ehtimolini oshiradi”.
AQSH yadroviy obyektlar nishonga olinsa, javob hujumidan Isroilni himoya qilish uchun razvedka ma’lumotlari to‘plashni kuchaytirmoqda. Tramp ma’muriyatiga yaqin amaldorga ko‘ra, AQSH Isroil harbiylariga yadroviy obyektlarga hujumga tayyorgarlik ko‘rishda yordam bermasligi mumkin.
Agar Isroil zarba berishga qaror qilsa, bu Tramp bilan munosabatlarning uzilishiga olib keladi va AQSH chetlab o‘tmoqchi bo‘lgan Yaqin Sharqdagi kengroq mintaqaviy mojaroni keltirib chiqaradi, deya ta’kidlaydi CNN.
Sobiq razvedka xodimi Jonatan Panikoff fikricha, Isroil bosh vaziri Binyamin Netanyaxu ularga to‘g‘ri kelmaydigan AQSH-Eron kelishuvidan qochishga harakat qilmoqda. Biroq ayni paytda Trampning qo‘llab-quvvatlashini saqlab qolmoqchi.
The New York Times gazetasi Isroil may oyida Eron yadroviy inshootlariga zarba berishni rejalashtirgani, biroq Tramp Tehron bilan muzokaralar boshlangani tufayli rejadan voz kechganini aytgandi. Shunga qaramay, Isroil rasmiylari yaqin oylarda hujum uyushtirish imkoniyatini ko‘rib chiqmoqda.
The Washington Post nashri yozishicha, Trampning milliy xavfsizlik bo‘yicha sobiq maslahatchisi Mayk Uolts Isroilning harbiy kuch ishlatish zarurligi haqidagi fikriga qo‘shilgan. Shu sababli AQSH prezidenti Uoltsni bu lavozimdan olib tashlagani aytilmoqda.
Izoh (0)