Vengriya adliya vaziri Bentse Tujon mamlakatning Xalqaro jinoiy sudi a’zoligidan (XJS) chiqish niyatini e’lon qildi. U bu haqda o‘tgan hafta Tashqi ishlar va savdo vazirligida bo‘lib o‘tgan elchilar uchrashuvida ma’lum qilgan.
Ushbu bayonot Isroil bosh vaziri Binyamin Netanyaxuning Vengriyaga tashrifi arafasida yangradi.
Vengriya ommaviy axborot vositalarining xabar berishicha, agar Vengriya XJSdan chiqish bo‘yicha qat’iy qaror qabul qilsa, bu jarayon uzoq davom etib, taxminan, bir yilga cho‘zilishi mumkin. Hukumat parlamentga a’zolikni to‘xtatish to‘g‘risidagi qaror loyihasini taqdim etishni rejalashtirmoqda va agar ko‘pchilik ovozi bilan ma’qullansa, a’zolikdan chiqish to‘g‘risida rasmiy e’lon qilinadi.
Yevrokomissiya matbuot kotibi Anita Hipper xabarlarga izoh berar ekan, idora mamlakatning bunday niyati haqida rasmiy xabar olmaganini ta’kidladi.
“Agar bu ma’lumot to‘g‘ri bo‘lsa, bundan chuqur afsusdamiz”, deya qo‘shimcha qildi Anita Hipper.
Vengriyaning XJSdan chiqishi to‘g‘risidagi siyosiy qaror aslida bir necha hafta oldin qabul qilingan bo‘lsa-da, hukumat AQSH prezidenti Donald Trampning XJS bo‘yicha pozitsiyasi qanday bo‘lishini kutayotgan edi.
Tramp Binyamin Netanyaxuni hibsga olish orderi uchun Gaaga sudiga sanksiyalar kiritishini e’lon qilgach, Vengriya hukumati buni “yashil chiroq” sifatida qabul qilgan.
Isroil bosh vaziri Binyamin Netanyaxu Xalqaro jinoyat sudi tomonidan G‘azo sektoridagi insoniyatga qarshi jinoyatlar va harbiy jinoyatlar uchun hibsga olish orderi berilganiga qaramay, Vengriyaga tashrif buyurishi kutilmoqda.
Ta’kidlash joizki, Vengriya Xalqaro jinoyat sudining Rim statutini imzolagan va ratifikatsiya qilgan. Ya’ni Budapesht rasman statutni ma’qullagan, biroq uni amalga oshirish uchun o‘z qonunchiligini o‘zgartirmagan. Shu sababli Budapesht Netanyaxuni hibsga olish bo‘yicha berilgan orderni bajarish niyatida emas.
Izoh (0)