G‘azo sektoridagi barcha shifoxonalarning kamida 94 foizi shikastlangan yoki vayron etilgan, Falastin anklavi shimolida yashovchilar deyarli har qanday tibbiy yordam olish imkoniyatidan mahrum bo‘lgan. Bu haqda Jahon sog‘liqni saqlash tashkiloti (JSST) hisobotida keltirildi.
“G‘azo sektoridagi 36 ta shifoxonadan atigi 19 tasi dori-darmonlarning jiddiy tanqisligi, tibbiyot xodimlarining yetishmasligi va xavfsizlik bilan bog‘liq muammolarga qaramay faoliyatini davom ettirmoqda va ulardan faqat 12 tasi turli xil tibbiy xizmatlarni ko‘rsata oladi, qolganlari esa faqat asosiy va shoshilinch yordam bera oladi. G‘azo sektoridagi barcha shifoxonalarning kamida 94 foizi shikastlangan yoki vayron etilgan”, deyiladi hujjatda.
Ma`lum qilinishicha, anklav hududida jangovar harakatlar 2025-yil 18-martda qayta boshlanganidan beri JSST tibbiy muassasalarga 28 ta hujumni qayd etgan, 2023-yil oktyabr oyidan beri esa bunday hujumlar soni kamida 697 taga yetgan.
“Anklav shimolida yashovchilar deyarli barcha tibbiy yordamdan mahrum bo‘lgan. Janubdagi kasalxonalar yaradorlar bilan to‘lib ketgan. Hozirda G‘azo sektorida 2 milliondan ortiq aholi uchun atigi 2 mingta kasalxona o‘rni mavjud”, deya ta’kidladi JSST.
Shuningdek, tashkilot “davom etayotgan jangovar harakatlar va harbiylarning mavjudligi shifokorlarga tibbiy yordam ko‘rsatishga va zaxiralarni kasalxonalarga yetkazib berishga to‘sqinlik qilayotgani”ni qo‘shimcha qilgan.
Tashkilot mintaqada zudlik bilan va doimiy ravishda o‘t ochishni to‘xtatishga chaqirib, “BMT va uning hamkorlari G‘azo sektori hududiga yordam yetkazish bo‘yicha aniq, tamoyilli va samarali rejaga ega” ekanini eslatgan.
Buyuk Britaniya Tashqi ishlar vazirligi rahbari Devid Lemmi Isroil armiyasining G‘azo sektoridagi yangi operatsiyasi sababli Isroil bilan erkin savdo bitimini tuzish bo‘yicha muzokaralarni to‘xtatganini ma’lum qildi.
Bundan oldin Netanyaxu Isroil G‘azo sektorining butun hududini nazorat qilishini va Falastinning HAMAS harakatiga “gumanitar yordamni talon-taroj qilishiga” yo‘l qo‘ymasligini aytgan edi.
18-may kuni Isroil mudofaa kuchlari (SAHAL) “Gideon aravalari” operatsiyasi doirasida G‘azo sektorida keng ko‘lamli quruqlikdagi harakatlarni boshladi. SAHAL xabarida aytilishicha, bu harakatlar “G‘azoda joylashgan terrorchi tashkilotlarga” qarshi qaratilgan.
Izoh (0)