Hindiston xavfsizlik kuchlari chegarani noqonuniy kesib o‘tishga uringan Pokiston fuqarosini otib o‘ldirdi. Bu haqda AFP agentligiga tayanib DW xabar qildi.
Hindistonning Chegara xavfsizlik kuchlari (BSF) bergan bayonotga ko‘ra, voqea Gujarot shtatida yuz bergan. 23-may, juma kuni kechqurun chegara bo‘yicha patrullik qilayotgan harbiylar “shubhali shaxs”ni ko‘rgan va uni to‘xtashga chaqirgan. Ammo u bu buyruqni e’tiborsiz qoldirib, yugurishda davom etgan. Shundan so‘ng harbiylar unga qarata o‘q uzganini ma’lum qilishgan.
Hindiston va Pokiston o‘rtasidagi ziddiyat
Ikki davlat o‘rtasidagi munosabatlar 22-aprel kuni Kashmirning Pahalgam hududida yuz bergan terrorchilik hujumi sabab keskinlashdi. Hujum oqibatida 26 kishi halok bo‘ldi. Qurolli shaxslar mahalliy aholi va sayyohlarga qarata o‘t ochdi. Hindiston Pokistonni bu hujumni qo‘llab-quvvatlashda aybladi. Pokiston mazkur da’voni rad etib, tekshiruv o‘tkazishni talab qildi.
Hindiston Pokiston bilan 1960-yildagi Hind suvlar to‘g‘risidagi shartnomani to‘xtatib, chegara bo‘ylab suv oqimini to‘xtatib qo‘ydi. Pokiston bu urush ochishga teng ekanini bildirdi. Mamlakat Hindiston bilan diplomatik va savdo aloqalarini chekladi, havo maydonini yopdi va savdo aloqalarini to‘xtatdi.
Chegara bo‘ylab kichik qurolli to‘qnashuvlar va raketa sinovlari ko‘paydi. Pokiston qisqa masofali Fatah raketasini sinovdan o‘tkazdi, Hindiston esa xavfsizlik mashg‘ulotlarini kuchaytirdi Xalqaro hamjamiyat, jumladan Qo‘shma Shtatlar, tomonlarni ziddiyatni eskalatsiya qilmaslikka chaqirib, diplomatik kanallarni tiklashga chaqirgandi.
Hindiston va Pokiston 10-may kuni soat 17:00 dan boshlab quruqlikda, havoda va dengizda barcha otishmalar va harbiy harakatlarni to‘xtatishga kelishib oldi. Bir necha soat o‘tgach, tomonlar bir-birini o‘t ochishda aybladi. AQSH vositachiligida yadro quroliga ega qo‘shnilar o‘rtasida kelishilgan o‘t ochishni to‘xtatish tartibi hozircha saqlanib qolgan.
Izoh (0)