HAMAS garovga olinganlarni ozod qilishni rad etgan taqdirda, G‘azo sektoridagi urush yanada shiddatli tus olib, “radikallar” mag‘lub etilmaguncha tugamaydi. Bu haqda Isroil mudofaa vaziri Israel Kats bayonot berdi.
Agar HAMAS garovga olinganlarni ozod qilishni to‘xtatsa, o‘t ochishni to‘xtatish bo‘yicha kelishuvlar bo‘lmaydi, balki urush bo‘ladi. G‘azodagi yangi urush o‘t ochishni to‘xtatishdan oldingi urushdan keskin farq qiladi va u HAMASni mag‘lub etib, barcha garovga olinganlarni ozod qilmaguncha tugamaydi. Shuningdek, bu AQSH prezidentining G‘azo bo‘yicha tashabbuslarini amalga oshirish imkonini beradi, dedi Kats.
Avvalroq Isroil bosh vaziri Binyamin Netanyaxu ham agar HAMAS garovda ushlab turilgan isroilliklarni 15-fevral kuni tushgacha ozod qilmasa, Isroil G‘azo sektoriga hujumni qayta boshlashini aytgan edi. Netanyaxuning so‘zlariga ko‘ra, HAMAS 10-fevral kuni garovga olinganlarni qo‘yib yubormaslik qarorini e’lon qilib, “bitim shartlarini buzgan”.
Tramp ham HAMASga tahdid qilmoqda
AQSH prezidenti HAMAS harakatidan barcha garovdagi isroilliklarni 15-fevral kuni soat 12:00 gacha ozod qilishni talab qildi. Agar ular ozod etilmasa, “jahannam boshlanishi”ni ta’kidladi.
Bittalab, ikkitalab, uchtalab, to‘rttalab emas. Hammasi birdan. Biz hammasini qaytarmoqchimiz. Men faqat o‘z nomimdan gapiryapman. Isroil o‘z bilganicha ish tutishi mumkin, deya ta’kidladi u.
Agar HAMAS shartlarni bajarmasa, Tramp Isroilga tashkilot bilan tuzilgan sulhni bekor qilishni tavsiya qilmoqda.
HAMAS nega garovga olinganlarni berishni to‘xtatdi?
Falastin harakati Isroilni o‘t ochishni to‘xtatish to‘g‘risidagi kelishuvni buzganlikda, jumladan, G‘azodagi falastinliklarga havo hujumlari uyushtirganlikda ayblab, garovga olinganlarni ozod qilish kelasi shanba kuniga qoldirilishini aytgan.
So‘nggi uch hafta davomida biz dushman tomonidan kelishuv shartlarining doimiy ravishda buzilishini kuzatdik, dedi HAMASning harbiy qanoti hisoblanmish “Izzaddin al-Qassam brigadalari” guruhi vakili Abu Ubayda.
HAMAS shu munosabat bilan15-fevral kuni ozod qilinishi kutilayotgan asirlarni Isroilga qaytarishni keyingi ogohlantirishgacha kechiktirishga qaror qilgan. U Isroil kelishuv qoidalariga rioya qilishi va so‘nggi haftalarda yetkazilgan zararni qoplashi kerakligini ta’kidlagan. Keyingi almashinuv shanba kuniga belgilangan bo‘lib, unda yuzlab falastinlik mahbuslar evaziga uch nafar isroillik garovga olinganlarni ozod qilish rejalashtirilgandi.
Isroilni kelishuvni muntazam ravishda buzishda ayblagan Abu Ubaydaning ta’kidlashicha, ayblovlar “ko‘chirilgan falastinliklarga G‘azo shimoliga qaytishga ruxsat berishni kechiktirish, havo hujumlari va sektorning turli hududlarini o‘qqa tutish, shuningdek, kelishuvlarga muvofiq gumanitar yordam yetkazib berishga ko‘maklashishga qodir emaslikni o‘z ichiga oladi”.
Izoh (0)