Urush tugaganidan so‘ng Falastinning normal hayotga qaytishi uchun 15 yil kerak bo‘ladi. Bu haqda Bag‘dodda Falastin milliy iqtisodiyot vaziri Muhammad al-Amur ma’lum qildi.
Iroq axborot agentligining xabar berishicha, Muhammad Al-Amur panarab tashkilotining 34-sammiti arafasida o‘tkazilayotgan Arab davlatlari ligasi (ADL) iqtisodiy va ijtimoiy masalalar bo‘yicha kengashi yig‘ilishida so‘zga chiqqan.
“Isroil bilan urush tugaganidan keyin normal hayotga qaytishimiz uchun 15 yil zarur bo‘ladi. Hozirgi vaziyatga qaramay, falastinliklar matonat ko‘rsatmoqda. Okkupatsiya qancha davom etmasin, xalqimiz mag‘lub bo‘lmaydi”, deydi al-Amur.
Uning ta’kidlashicha, vujudga kelgan vaziyatga qaramay, falastinliklar matonat namoyish etmoqda. Falastin xalqi bosqinchilik qancha davom etmasin, mag‘lub bo‘lmaydi.
“G‘azo genotsidga duchor bo‘lmoqda. Gumanitar yordam ortilgan minglab yuk mashinalari Isroil tomonidan sektorga kiritilmayapti. Shu bilan birga, dunyo G‘azodagi qirg‘inlarni jim kuzatmoqda. Iordan daryosining G‘arbiy qirg‘og‘ida 1 mingdan ortiq Isroil nazorat-o‘tkazish punktlari joylashgan bo‘lib, bu iqtisodiyotni vayron qilmoqda”, Falastin milliy iqtisodiyot vaziri.
Uning ma’lumotlariga ko‘ra, G‘arbiy Qirg‘oq va G‘azo sektorida ishsizlik darajasi 51 foizga yetgan.
2025-yil 2-martdan beri G‘azo sektoriga gumanitar yordam yetkazilmayapti, Isroilning qarori bilan barcha nazorat-o‘tkazish punktlari yopiq holda qolmoqda.
18-mart kuni Isroil armiyasi sektorda harbiy harakatlarni qayta boshlab, unga keng ko‘lamli zarbalar berdi va shu bilan joriy yilning yanvar oyida o‘rnatilgan tinchlik rejimini buzdi. Bosh vazir Binyamin Netanyaxu idorasi buni HAMASning muzokaralarda vositachilar va AQSH prezidentining maxsus vakili Stiven Uitkoff tomonidan bildirilgan takliflarni rad etgani bilan izohladi va G‘azodagi operatsiyaning maqsadi barcha garovga olinganlarni ozod qilish ekanini ta’kidladi. Radikal kuchlar harbiy harakatlarning qayta boshlanishi uchun javobgarlikni Isroil va AQSH zimmasiga yukladi.
Izoh (0)