AQSH Ukrainaga harbiy yordam berishdan bosh tortsa, Yevropa davlatlari Amerikada ishlab chiqarilgan qurollarni sotib olib, ularni Ukrainaga yetkazib berishni ko‘rib chiqmoqda. Bu haqda Bloomberg agentligi xabar berdi. Nashrga ko‘ra, Yevropa Ittifoqining o‘z zaxiralari va qurol ishlab chiqarish imkoniyatlari pastligi sabab ushbu qaror qabul qilinishi mumkin.
Agar AQSH prezidenti Donald Tramp Ukrainaga qurol yetkazib berishdan bosh tortsa, Yevropa buni amalga oshiradi. Agentlikning ishonchli manbalariga tayanib yozishicha, ilgari AQSH sobiq prezidenti Jo Bayden tomonidan tasdiqlangan va moliyalashtirilgan qurol-yarog‘ yetkazib berish dasturi shu yozda tugashi mumkin. Yuzaga kelgan bo‘shliqni to‘ldirish uchun Yevropaning imkoniyatlari yetarli emas. Bloomberg tahlilchilari Rossiya prezidenti Vladimir Putin frontdagi bu vaziyatdan foydalanishga urinishidan ogohlantirmoqda.
AQSH Ukrainani yolg‘iz qoldirishi mumkin
AQSH prezidenti Donald Tramp bir necha bor muzokaralar boshi berk ko‘chaga kirsa, Vashington bu jarayondan chiqishini aytgan. Oq uy ilgari Yevropaning Putin ustidan bosimni kuchaytirish va zudlik bilan o‘t ochishni to‘xtatishga majbur qilish haqidagi chaqiriqlarini rad etgan edi.
Ayni paytda, Kreml Trampga va’da qilingan tinchlik muzokaralarini cho‘zayotgan ko‘rinadi va yozgi hujumga tayyorgarlik ko‘rayotgan bo‘lishi mumkin. Shu hafta boshida AQSH davlat kotibi Marko Rubio Rossiya bir necha kun ichida o‘t ochishni to‘xtatish bo‘yicha o‘z shartlarini taqdim etishini aytgan edi, biroq hozircha muzokaralarda aniq natijalar ko‘zga tashlanmayapti.
The Wall Street Journal’ning yozishicha, Tramp 19-may kuni Putin bilan telefon orqali suhbatdan so‘ng Yevropa yetakchilarini Rossiya prezidenti urushni tugatmoqchi emasligi haqida xabardor qilgan. Nashrga ko‘ra, Putin o‘zini urushda g‘alaba qozonayapti deb hisoblaydi. Yevropa yetakchilari ilgari ham Putinning tinchlikni istamayotganini taxmin qilgan, ammo bu taxmin ilk bor Trampning og‘zidan tasdiq topdi.
Izoh (0)