Isroil bosh vaziri Binyamin Netanyaxu G‘azo sektorining butun hududini harbiy nazoratga olish niyatida ekanligini ma’lum qildi. Bu haqda u 19-may kuni o‘zining Telegram kanalida e’lon qilingan videomurojaatda aytib o‘tdi.
Netanyaxu harbiy harakatlarning maqsadlari o‘zgarmaganini ta’kidlab, bular Falastinning HAMAS radikal harakatini tor-mor etish va G‘azoda garovga olingan isroilliklarni ozod qilish uchun ekanligi bildirgan. Shuningdek, u yaqin kelajakda Isroil AQSH bilan hamkorlikda G‘azo aholisining gumanitar yordamdan foydalanishini ta’minlash va HAMASning uni talon-toroj qilishining oldini olish uchun tarqatish punktlari tarmog‘ini tashkil etishini qo‘shimcha qildi.
“Bu HAMASni yo‘q qilishning bir qismi bo‘lib, kuchli harbiy bosim, keng ko‘lamli bosqinimiz va amalda butun G‘azoni nazoratga olish hamda HAMASni insonparvarlik yordamini talon-toroj qilish imkoniyatidan mahrum etish bilan bir vaqtda amalga oshiriladi. Mana shu harbiy reja va g‘alaba rejasi”, dedi Netanyaxu.
Bosh vazir anklavdagi keyingi harakatlar rejasi haqida so‘z yuritarkan, Isroil armiyasi hozir u yerda “juda katta, shiddatli va kuchli faoliyat” olib borayotganini ta’kidlagan.
“Biz sektorning butun hududini nazoratga olishni rejalashtirmoqdamiz. Bu biz qilmoqchi bo‘lgan ish”, dedi u.
18-may kuni Isroil armiyasi “Gideon aravalari” nomli keng ko‘lamli quruqlik operatsiyasi doirasida anklavning shimoliy va janubiy hududlarida jangovar harakatlar boshlanganini e’lon qildi. Unda beshta diviziya ishtirok etmoqda.
May oyi boshida Isroil G‘azo sektori aholisini mintaqa tashqarisiga chiqarish maqsadida “Gideon aravalari” maxsus operatsiya o‘tkazishi ma`lum qilingandi. Operatsiya doirasida anklav janubida yagona gumanitar hudud tashkil etilishi rejalashtirilgan bo‘lib, u yerda 2 millionga yaqin tinch aholi joylashtirilishi ko‘zda tutilgan.
Aytilishicha, Misr va G‘azo sektori chegarasi yaqinida 50-70 kvadrat kilometrlik maydon doirasida zona tashkil etiladi.
Izoh (0)