Fransiya prezidenti Emmanuel Makron yaqin oylarda uning mamlakati Falastin davlatini tan olishi mumkinligini aytdi. Bu haqda Al Jazeera xabar berdi.
Makron bu qarorni BMTning Isroil-Falastin mojarosi bo‘yicha konferensiyasida yakunlashni maqsad qilganini aytdi. Konferensiyaga iyun oyida Fransiya va Saudiya Arabistoni hamraislik qiladi.
Biz tan olish sari qadam tashlashimiz kerak va buni kelgusi oylarda amalga oshiramiz. Men buni birovni rozi qilish uchun qilmayapman. Men buni qachondir to‘g‘ri bo‘ladigan vaqt kelganda qilaman, dedi siyosatchi.
Falastin tashqi ishlar vaziri Varsen Agabekyan Shahin bu “Falastin xalqi huquqlarini himoya qilish va ikki davlat yechimiga muvofiq to‘g‘ri yo‘nalishdagi qadam” bo‘lishini aytdi.
Isroil tashqi ishlar vaziri Gideon Saar esa Falastin davlatining har qanday “bir tomonlama tan olinishi” “HAMAS uchun rag‘bat” bo‘lishini bildirdi.
Har qanday davlat tomonidan mavhum Falastinning “bir tomonlama tan olinishi”, hammamizga ma’lum hozirgi vaziyatda, terrorizm uchun mukofot va HAMAS uchun rag‘bat bo‘ladi. Bunday harakatlar mintaqamizda tinchlik, xavfsizlik va barqarorlikni yaqinlashtirmaydi, aksincha ularni yanada uzoqlashtiradi, deb yozdi u X ijtimoiy tarmog‘ida.
Falastin hozirgacha BMTning 193 a’zosidan 146 tasi tomonidan suveren davlat sifatida tan olingan, 2024-yil ularning safiga Armaniston, Sloveniya, Irlandiya, Norvegiya, Ispaniya, Bagam orollari, Trinidad va Tobago, Yamayka va Barbados qo‘shilgan.
Biroq Falastin davlatchiligini xalqaro miqyosda qo‘llab-quvvatlash ortib borayotganiga qaramay, AQSH, Avstraliya, Buyuk Britaniya va Germaniya kabi bir qator yirik G‘arb davlatlari uni tan olishdan bosh tortgan.
Makron Yaqin Sharqdagi ba’zi davlatlarga Isroil davlatini o‘z navbatida tan olish imkonini beruvchi “jamoaviy dinamika”ni oldindan ko‘rganini aytdi. Isroilni tan olmaydigan davlatlar qatoriga Saudiya Arabistoni, Eron, Iroq, Suriya va Yaman kiradi.
Fransiya prezidenti aytishicha, Falastinni davlat sifatida tan olish Fransiyaga “Isroilning mavjud bo‘lish huquqini inkor etuvchilarga qarshi kurashda aniq bo‘lish va mintaqada kollektiv xavfsizlikni ta’minlash majburiyatini olish imkonini beradi”.
Fransiya uzoq vaqtdan beri Isroil-Falastin mojarosini ikki davlat yechimi orqali hal qilish tarafdori bo‘lib kelgan. 2023-yil 7-oktyabrda HAMASning Isroilga hujumidan keyin ham o‘z siyosatini davom ettirgan.
Ammo Fransiyaning Falastin davlatini rasman tan olishi muhim siyosiy o‘zgarish bo‘lib, bu Isroilning bunday harakatlarni erta deb hisoblashiga qaramay, unga qarshi turishga olib kelishi mumkin.
Yaqinda Misrga tashrifi chog‘ida Makron prezident Abdulfattoh as-Sisi va Iordaniya qiroli Abdulla II bilan muzokaralar o‘tkazib, G‘azo va Isroil tomonidan bosib olingan G‘arbiy Sohilning har qanday ko‘chirilishi yoki anneksiya qilinishiga qat’iyan qarshi ekanini aytgandi.
Izoh (0)