Isroil mudofaa vaziri Isroil Kats Isroil armiyasiga G‘azo aholisiga Falastin hududini ixtiyoriy ravishda tark etish va ularni qabul qilishga tayyor bo‘lgan istalgan mamlakatga jo‘nab ketish imkonini beruvchi reja ishlab chiqishni topshirdi.
Reja chegara o‘tish punktlaridan chiqish imkoniyatlarini, shuningdek, dengiz va havo yo‘nalishlari uchun maxsus mexanizmlarni o‘z ichiga oladi, deb yozdi Kats X ijtimoiy tarmog‘ida.
Kats AQSH prezidenti Donald Trampning G‘azo sektori aholisiga uni tark etish imkoniyatini beruvchi “dadil tashabbusi”ni olqishladi. Uning so‘zlariga ko‘ra, mazkur tashabbus G‘azo aholisiga “keng imkoniyatlar” taqdim etishi, ularga qabul qiluvchi mamlakatlarga ko‘chishda yordam berishi va HAMAS ketganidan so‘ng “xavf tug‘dirmaydigan qurolsizlantirilgan G‘azoni tiklash” rejalarini amalga oshirishga ko‘maklashishi mumkin. Biroq, u mazkur jarayon ko‘p yillar talab qilishini ta’kidladi.
Vazirga ko‘ra, HAMAS “G‘azo aholisidan jonli qalqon sifatida foydalangan va terror infratuzilmasini qurgan”.
Hozirda esa HAMAS ularni gumanitar yordam tizimi orqali pul undirish va ketishlariga to‘sqinlik qilish yo‘li bilan garovda ushlab turibdi. G‘azo aholisi butun dunyodagi kabi erkin harakatlanish va migratsiya huquqiga ega bo‘lishi kerak, deya qo‘shimcha qildi u.
Katsning fikricha, falastinliklar ko‘chib o‘tishi mumkin bo‘lgan mamlakatlar qatoriga Ispaniya, Irlandiya, Norvegiya va Isroilning G‘azo sektoridagi harakatlari yuzasidan unga qarshi “yolg‘on ayblovlar qo‘ygan” boshqa davlatlar kiradi. U bu davlatlar ushbu mintaqa aholisini qabul qilishga qonunan majbur ekanligini, aks holda ularning “ikkiyuzlamachiligi fosh bo‘lishini” ta’kidladi. Kats, shuningdek, tartibli immigratsiya dasturiga ega bo‘lgan va ilgari G‘azo sektori aholisini qabul qilishga tayyorligini bildirgan Kanadani ham tilga oldi.
Tramp: “AQSH G‘azo sektorini boshqaradi”
AQSH prezidenti G‘azo sektorini “snos” maydonchasi deb atagandi. U anklav aholisini turli mamlakatlarga, jumladan, Iordaniya va Misrga ko‘chirib o‘tkazish mumkinligini aytgan. U Qo‘shma Shtatlar bu jarayonni moliyalashtirmasligi, chunki xarajatlarni qoplashga Yaqin Sharq davlatlarining qurbi yetishini ta’kidlagandi. Vashington esa mintaqadagi ishlar uchun javobgar bo‘ladi va zarurat tug‘ilganda u yerga o‘z qo‘shinlarini yuborishi mumkinligini aytgan.
Saudiya Arabistoni hukumati o‘z bayonotida falastinliklarni o‘z yerlaridan siqib chiqarishga qaratilgan har qanday urinishlarni qabul qilmasligini ta’kidlab, Falastin davlati tuzilmagunicha Isroil bilan munosabat o‘rnatmasligini e’lon qildi.
HAMAS Trampning G‘azodagi falastinliklarni chiqarib yuborishga chaqirgan da’vatlarini qoralab, ularni “o‘z yeridan quvish” deb atadi.
Avstraliyaning mahalliy aholisi vakili bo‘lgan siyosatchi Lidiya Torp Trampning G‘azoni “egallash” haqidagi fikrlarini “etnik tozalash va mustamlakachilikning ochiq chaqirig‘i” deb baholadi.
Amnesty International inson huquqlari tashkiloti o‘tgan yilning noyabr oyida Xalqaro jinoiy sud (XJS) Netanyaxuni qamoqqa olish uchun order bergan bo‘lsa-da, uni qamoqqa olmasdan, AQSH “xalqaro odil sudlovga nisbatan nafratini namoyish etayotganini” bildirdi.
AQSHda bir qator demokratlar Trampning rejasini tanqid qildi, demokrat senator Kris Merfi esa AQSHning G‘azoga bostirib kirishi minglab amerikalik askarlarning halok bo‘lishiga va Yaqin Sharqda o‘n yillab davom etadigan urushga olib kelishini ta’kidladi.
Izoh (0)