Indoneziya prezidenti Prabovo Subianto G‘azo sektorida davom etayotgan urushdan jabrlangan falastinliklarga vaqtincha boshpana berishga tayyor ekanini aytdi. Bu haqda Reuters xabar berdi.
Prabovoning so‘zlariga ko‘ra, birinchi bosqichda mingga yaqin falastinlik Indoneziyaga evakuatsiya qilinishi mumkin. Prezident tashqi ishlar vaziriga ushbu masalada Falastin tomoni va boshqa tegishli tomonlar bilan muzokaralarni tezlashtirishni topshirgan.
Biz jarohatlanganlar, ruhiy zarba olganlar va yetim qolgan bolalarni evakuatsiya qilishga tayyormiz. Ular Indoneziyada vaqtincha bo‘ladi — to‘liq sog‘ayib ketguncha yoki G‘azoda xavfsizlik ta’minlanmaguncha, dedi Indoneziya prezidenti.
Prabovoning bu bayonoti AQSH prezidenti Donald Tramp tomonidan ilgari surilgan falastinliklarni G‘azodan doimiy ko‘chirish taklifiga javoban yangradi. Indoneziya bu taklifni qat’iyan rad etgan edi.
Tramp G‘azo aholisini ko‘chirishni va “ko‘plab davlatlar” ularni qabul qilishga tayyorligini aytgandi. Isroil bosh vaziri Binyamin Netanyaxu uning taklifini qo‘llab-quvvatlagan.
Boshqa istalgan jangovar harakatlar bo‘layotgan hududlardan, jumladan, Ukraina, Suriya yoki boshqa istalgan joydan odamlar ketishi mumkin edi. G‘azo esa odamlar qamalgan yagona joy. Biz ularni qamab qo‘ymaganmiz. Odamlarga tanlash imkoniyatini berishning nimasi yomon?, degan Tramp.
Isroil bosh vaziri so‘zlariga ko‘ra, ular Tramp bilan G‘azo sektoridan falastinliklar ketishi mumkin bo‘lgan mamlakatlarni muhokama qilgan. Netanyaxu bu davlatlar agar falastinliklar ketishni istasa, ularni qabul qilishi mumkinligini aytmoqda. Isroil hududni tiklash uchun yillar kerakligini, shuning uchun uning aholisi muqobil variantga ega bo‘lishi muhimligini bildirgan edi.
Ma’lumotlarga ko‘ra, Indoneziya G‘azoga insonparvarlik yordami yuborgan va ikki davlat yechimi tarafdori hisoblanadi.
2023-yil 7-oktyabrda boshlangan G‘azodagi urush oqibatida hozirgacha 50 mingdan ortiq falastinlik halok bo‘ldi. Urush HAMAS janchilarining Isroil janubida 1 200 kishini o‘ldirib, 250 kishini garovga olgani ortidan boshlangandi.
Indoneziya hukumati mojaroni tinch yo‘l bilan hal qilishda faol ishtirok etishni istamoqda. Prabovo bu rejalar oson emasligini tan olib, Indoneziya xalqaro tinchlikka hissa qo‘shishga tayyorligini aytgan.
Izoh (0)