AQSH prezidenti Donald Tramp Falastinning HAMAS harakatidan barcha garovdagi isroilliklarni 15-fevral kuni soat 12:00 gacha ozod qilishni talab qilmoqda.
Shanba soat 12:00. Agar asirlar bu yerda bo‘lmasa, jahannam boshlanadi, dedi Tramp.
Uning so‘zlariga ko‘ra, garovga olinganlarning barchasi bosqichma-bosqich emas, balki bir vaqtning o‘zida ozod qilinishi kerak:
Bittalab, ikkitalab, uchtalab, to‘rttalab emas. Hammasi birdan. Biz hammasini qaytarmoqchimiz. Men faqat o‘z nomimdan gapiryapman. Isroil o‘z bilganicha ish tutishi mumkin, deya ta’kidladi u.
Agar HAMAS shartlarni bajarmasa, Tramp Isroilga tashkilot bilan tuzilgan sulhni bekor qilishni tavsiya qilmoqda.
Tramp AQSHning aniq qadamlari haqidagi savollarga noaniq javob berib, HAMAS tez orada u nimani nazarda tutayotganini bilib olishini aytdi. U Qo‘shma Shtatlarning mazkur mojaroga harbiy aralashuvi haqidagi savolga “nima bo‘lishini ko‘ramiz” deya javob berdi.
Tramp ozod qilingan asirlarning holatini holokost qurbonlari bilan taqqosladi:
Ular konslager mahbuslariga o‘xshardi. Ular juda yomon ahvolda, holdan toygan edi. Buni qachongacha davom ettirish mumkinligini bilmayman.
Bir kun avval HAMAS Isroilni o‘t ochishni to‘xtatish to‘g‘risidagi kelishuvni buzganlikda, jumladan, G‘azodagi falastinliklarga havo hujumlari uyushtirganlikda ayblab, garovga olinganlarni ozod qilish kelasi shanba kuniga qoldirilishini aytgan edi.
So‘nggi uch hafta davomida biz dushman tomonidan kelishuv shartlarining doimiy ravishda buzilishini kuzatdik, deb yozdi HAMASning harbiy qanoti hisoblanmish “Izzaddin al-Qassam brigadalari” guruhi vakili Abu Ubayda o‘zining Telegram kanalida.
Uning qayd etishicha, shu munosabat bilan HAMAS 15-fevral kuni ozod qilinishi kutilayotgan asirlarni Isroilga qaytarishni keyingi ogohlantirishgacha kechiktirishga qaror qilgan. U Isroil kelishuv qoidalariga rioya qilishi va so‘nggi haftalarda yetkazilgan zararni qoplashi kerakligini qo‘shimcha qildi. Keyingi almashinuv shanba kuniga belgilangan bo‘lib, unda yuzlab falastinlik mahbuslar evaziga uch nafar isroillik garovga olinganlarni ozod qilish rejalashtirilgan edi.
Isroilni kelishuvni muntazam ravishda buzishda ayblagan Abu Ubaydaning ta’kidlashicha, ayblovlar “ko‘chirilgan falastinliklarga G‘azo shimoliga qaytishga ruxsat berishni kechiktirish, havo hujumlari va sektorning turli hududlarini o‘qqa tutish, shuningdek, kelishuvlarga muvofiq gumanitar yordam yetkazib berishga ko‘maklashishga qodir emaslikni o‘z ichiga oladi”.
Sulh shartlariga ko‘ra, HAMAS 33 nafar isroillik asirni ozod qilishi kerak edi. Bunga javoban Isroil 1900 nafar falastinlik mahbusni mamlakatiga qaytarishi kerak.
Izoh (0)