AQSH prezidenti Donald Tramp G‘azo sektoriga amerikalik tinchlikparvar kuchlarni yuborish imkoniyatini istisno etmadi. Bu haqda Reuters xabar berdi.
Trampga ko‘ra, G’azo “g‘oyat muhim ko‘chmas mulk obyekti” hisoblanadi, uni tinch va erkin hududga aylantirish kerak. AQSH prezidenti Isroil bosh vaziri Binyamin Netanyaxu bilan qo‘shma matbuot anjumanida shunday bayonot bergan.
O‘ylaymanki, biz bu jarayonga jalb etilamiz. U yerda Amerika kabi tinchlikparvar kuchlarga ega bo‘lish, G‘azo sektorini nazorat qilish va unga egalik qilish yaxshi bo‘lardi, dedi u.
AQSH prezidenti G‘azo sektorini “hech kim yashashni istamaydigan ajoyib joy” deb atagan va Isroil tinchlik evaziga “G‘azoni berganini” aytgan.
Shuningdek, Tramp yana bir bor G‘azo sektori aholisini ko‘chirishni va “ko‘plab davlatlar” ularni qabul qilishga tayyorligini bildirgan. Netanyaxu uning taklifini qo‘llab-quvvatlagan. Uning fikricha, bu “odamlarga tanlov qilish imkonini berish”dan iborat.
Boshqa istalgan jangovar harakatlar bo‘layotgan hududlardan, jumladan, Ukraina, Suriya yoki boshqa istalgan joydan odamlar ketishi mumkin edi. G‘azo esa odamlar qamalgan yagona joy. Biz ularni qamab qo‘ymaganmiz. Odamlarga tanlash imkoniyatini berishning nimasi yomon? dedi u.
Isroil bosh vaziri so‘zlariga ko‘ra, ular Tramp bilan G‘azo sektoridan falastinliklar ketishi mumkin bo‘lgan mamlakatlarni muhokama qilgan. Netanyaxu bu davlatlar agar falastinliklar ketishni istasa, ularni qabul qilishi mumkinligini aytmoqda. Isroil hududni tiklash uchun yillar kerakligini, shu uchun uning aholisi muqobil variantga ega bo‘lishi muhimligini bildirgan.
AQSH prezidenti ta’kidlashicha, uning qarashlarini ko‘pchilik qo‘llab-quvvatlaydi. U yanvar oyida G‘azo sektoridan falastinliklarni ko‘chirishni taklif qilgan, fevral oyida esa eksklavni AQSH nazoratiga olish va uni “Yaqin Sharq daryosi”ga aylantirish niyati haqida gapirgan.
Arab davlatlari AQSHning niyatini qat’iyan qo‘llab-quvvatlamagan. CBS ma’lumotlariga ko‘ra, AQSH Somali, Sudan va vositachi orqali Suriya rasmiylariga G‘azo sektoridan 2,1 millionga yaqin falastinlikni qabul qilish taklifi bilan murojaat qilgan. Somalining AQSHdagi elchixonasi bu ma’lumotlarini rad etgan.
Izoh (0)