Saudiya Arabistoni 2026-yildan boshlab alkogol mahsulotlarini sotish va iste’mol qilishga ruxsat berishni rejalashtirmoqda. Bu qadam 2034-yilda o‘tkaziladigan futbol bo‘yicha jahon chempionatiga tayyorgarlikning bir qismi hisoblanadi. Bu haqda The Economic Times xabar berdi.
Spirtli ichimliklar faqat 600 ga yaqin turistlik joyda sotilishi rejalashtirilgan. Bular asosan mehmonxonalar, dam olish maskanlari va sayyohlar uchun mo‘ljallangan hududlar bo‘ladi. Pivo, vino va sidr sotib olish mumkin bo‘ladi. Kuchliroq spirtli ichimliklar uchun taqiq bekor qilinmaydi.
Bundan tashqari uyda, do‘konda yoki jamoat joylarida spirtli ichimliklar ichish mumkin emas. Har qanday qoidabuzarlik jarimaga sabab bo‘ladi, uning miqdoriga aniqlik kiritilmagan.
Mamlakatning alkogol siyosatidagi o‘zgarishlar Saudiya Arabistonining iqtisodiy o‘sish bo‘yicha milliy rejasi — Vision 2030’ning bir qismidir. U turizmni kengaytirishga qaratilgan. Mahalliy amaldorlar fikricha, bu ish o‘rinlari yaratish va xorijiy investitsiyalarni jalb etishga yordam beradi.
2024-yil yanvar oyida Ar-Riyodning diplomatik kvartalida Saudiya Arabistonidagi birinchi alkogol do‘koni ochilgandi. Bu yerda spirtli ichimliklarni faqat chet el diplomatlari va musulmon bo‘lmagan mamlakatlar elchixonalari xodimlari sotib olishi mumkin.
Ma’lumot o‘rnida, fevral oyida Saudiya Arabistonining Buyuk Britaniyadagi elchisi, shahzoda Xolid bin Bandar Al-Saud Jahon chempionati vaqtida alkogolli ichimliklar sotilishiga ruxsat berish uchun qonunlar o‘zgarmasligini aytgandi.
Har bir mamlakatning o‘z madaniyati bor. Biz mehmonlarni qabul qilishga tayyormiz, ammo o‘z madaniyatimizni boshqalar uchun o‘zgartirishni istamaymiz.
U shuningdek hazil bilan “Chindan ham, spirtli ichimliklarsiz yashay olmaysizmi?” deya qo‘shimcha qilgandi.
Saudiya Arabistonida spirtli ichimliklarga qo‘yilgan taqiq
Saudiya Arabistoni qo‘shni Kuvayt va Birlashgan Arab Amirliklarining Sharja shahriga o‘xshab, spirtli ichimliklarni to‘liq taqiqlagan dunyodagi sanoqli davlatlardan biri bo‘lib qolmoqda.
1950-yillarda Saudiya Arabistoni monarxiyasi asoschisi qirol Abdulaziz 1951-yilda sodir bo‘lgan voqeadan so‘ng spirtli ichimliklarni taqiqlashni joriy qildi. Qirolning o‘g‘illaridan biri shahzoda Mishari mast holda Jidda shahrida Britaniya vitse-konsuli Siril Usmonni tasodifan qurol bilan o‘ldirgan.
Mishari umrbod qamoq jazosiga hukm qilingan va qamoqqa tashlangan, o‘z maqomi bilan o‘lim jazosidan qutqarilgan. Mishari qirol Saud davrida qamoqdan ozod qilingan.
Ozodlikka chiqqandan so‘ng u AQSH va Buyuk Britaniyaga ketgan. U yerda 1973-yilgacha aviatsiya bo‘yicha tahsil olgan va Saudiya Arabistoni tarixidagi birinchi uchuvchiga aylangan.
Shahzoda Mishari 2000-yil 23-mayda Nyu Yorkda 68 yoshida vafot etgan. U qirollik oilasining bir qancha aʼzolari va taniqli shaxslari kabi Al-Adl qabristoniga dafn qilingan.
Izoh (0)