15-mart kuni HAMAS Isroil G‘azo sektorida o‘t ochishni to‘xtatsagina, garovga olingan 11 kishi va halok bo‘lgan 16 marhumning jasadini qaytarishini ma’lum qildi. AQSH rasmiylarining fikricha, HAMAS “mutlaqo amalga oshirib bo‘lmaydigan” talablarni qo‘ymoqda. Bu haqda Al Jazeera xabar berdi.
HAMASning yuqori lavozimli amaldorining aytishicha, Isroil fuqarolarini ozod qilish ikkinchi bosqich muzokaralari tugashi bilan boshlanadi. Isroil esa bunga javoban 50 kundan ortiq bo‘lmagan muddat ichida o‘t ochishni to‘xtatishi kerak. Shuningdek, Isroil HAMASga gumanitar yordam kirishiga to‘sqinlik qilmasligi hamda G‘azoning Misr bilan chegarasidagi strategik yo‘lakdan o‘z kuchlarini olib chiqishi lozim.
Ismini oshkor qilishni istamagan falastinlik amaldor HAMAS garovga olinganlar evaziga ko‘proq falastinlik mahbuslarni ozod qilishni ham talab qilishini aytdi.
HAMASning bu murojaatiga Isroil tomonidan hali munosabat bildirilmagan. Murojaatdan oldin Isroil bosh vaziri Binyamin Netanyaxu idorasi HAMASni “manipulyatsiya va ruhiy urush” olib borishda ayblagan.
14-mart kuni HAMASning yuqori lavozimli rahbari Xalil al-Hayya muzokaralar o‘tkazish maqsadida Qohiraga kelgan. Hozirda Misr va Qatar Isroilning G‘azoga o‘t ochishini to‘xtatishga erishishda asosiy vositachi vazifasini bajarmoqda.
Isroil-HAMAS bitimi
19-yanvarda erishilgan o‘t ochishni to‘xtatish kelishuviga ko‘ra, Isroil va HAMAS fevral oyi boshida ikkinchi bosqich bo‘yicha muzokaralarni boshlashi kerak edi. Bunda HAMAS uzoq muddatli sulh evaziga qolgan barcha garovga olinganlarni ozod qilishi lozim edi, ammo hozirga qadar faqat tayyorgarlik muzokaralari o‘tkazildi.
Isroil HAMASni yangi taklifni qabul qilishga majburlash uchun G‘azoning taxminan 2 million falastinligiga oziq-ovqat, yoqilg‘i va boshqa ta’minotlarni yetkazib berishni taqiqladi hamda hududga elektr energiyasini uzib qo‘ydi.
Izoh (0)