Microsoft o‘zining 50 yillik yubileyi marosimi chog‘ida kompaniyaning Isroil bilan sun’iy intellekt sohasidagi hamkorligiga norozilik bildirgan ikki xodimini ishdan bo‘shatdi. Bu haqda Al Arabiya xabar berdi.
Kompaniyaning aytishicha, xodimlardan biri tadbirni “ataylab izdan chiqarishga uringan” bo‘lsa, ikkinchisi esa ishdan ketish niyatida bo‘lgan. Ammo belgilangan sanadan besh kun oldin kompaniya bilan aloqalari uzilgan. Noroziliklar 4-aprel kuni Microsoft’ning Redmonddagi kampusida o‘tkazilgan yubiley tadbirida boshlangan.
Aboussad ismli xodima Microsoft’ning sun’iy intellektdan (SI) ezgulik yo‘lida foydalanish haqidagi da’volarini tanqid qilgan:
Siz sun’iy intellektni ezgulik uchun ishlatmoqchisiz, lekin Microsoft bu texnologiyani Isroil harbiylariga yetkazmoqda. 50 ming kishi halok bo‘ldi, Microsoft esa bu genotsidni quvvatlayapti, dedi u SI bo‘yicha bosh direktor Mustafo Suleymanga qarata.
U sahnaga Falastin xalqiga birdamlik ramzi bo‘lgan kufiya ro‘molini uloqtirgan, xavfsizlik xodimlari esa uni olib chiqib ketgan. Suleyman esa norozilikka tinch ohangda munosabat bildirib, “Rahmat, sizni eshitdim”, degan.
Keyinchalik yana bir Microsoft xodimi Vaniya Agraval ham tadbir davomida e’tiroz bildirgan. U 11-aprel kuni ishdan ketishi kerak edi, biroq menejer uni vaqtliroq ishdan bo‘shatgan.
Aboussad esa 7-aprel kuni suhbatga chaqirilib, ish joyidan darhol bo‘shatilgani haqida xabardor qilingan. Microsoft unga yo‘llagan xatda norozilikni ichki tartibda bildirish mumkinligi aytilgan va uning ochiq chiqishi “agressiv va noo‘rin” deb baholangan.
SI texnologiyalarining harbiy maqsadlarda qo‘llangani bo‘yicha tergovlar
Tergovga ko‘ra, Microsoft va OpenAI’ning sun’iy intellekt modellari G‘azo va Livandagi urushlarda Isroil armiyasi tomonidan bombardimon nishonlarini aniqlashda qo‘llanilgan. Jumladan, 2023-yilda Livanda xato yo‘lga qo‘yilgan hujum oqibatida uch qizaloq va buvisi halok bo‘lgani ma’lum qilingan.
Bu Microsoft’dagi ilk norozilik emas. Fevral oyida ham kompaniya xodimlari Isroil bilan shartnomalarni tanqid qilib, CEO Satya Nadella bilan uchrashuvdan chiqarib yuborilgan edi.
Microsoft bayonotida shunday deyiladi:
“Xodimlarimiz fikrini bildirish uchun imkoniyatlar bor. Ammo bu kompaniya faoliyatiga xalaqit bermasligi lozim. Agar bu talab buzilsa, xodimlardan joyini o‘zgartirish so‘raladi. Biz faoliyatimizda eng yuqori standartlarga amal qilamiz”.
2024-yil Google kompaniyasida ham shunga o‘xshash noroziliklar kuzatilgan. Project Nimbus loyihasi doirasida Isroilga SI texnologiyalari yetkazilishi sababli Nyu York va Kaliforniya ofislarida namoyishlar bo‘lib o‘tgan, natijada o‘nlab xodimlar ishdan bo‘shatilgan. Google xodimlari bu bo‘yicha AQSH Mehnat munosabatlari milliy kengashiga shikoyat arizasi topshirgan.
Izoh (0)