Isroil G‘azo sektori aholisini mintaqa tashqarisiga chiqarish maqsadida “Gideon aravalari” maxsus operatsiya o‘tkazadi. Bu haqda BAA nashri The National xabar bermoqda.
Ma’lumotlarga ko‘ra, “Gideon aravalari” operatsiyasi doirasida anklav janubida yagona gumanitar hudud tashkil etilishi rejalashtirilgan bo‘lib, u yerda 2 millionga yaqin tinch aholi joylashtirilishi ko‘zda tutilgan.
Aytilishicha, Misr va G‘azo sektori chegarasi yaqinida 50-70 kvadrat kilometrlik maydon doirasida zona tashkil etiladi.
“Bu yangi Nakbaga juda o‘xshab ketadi”, dedi bir manba, 1948-yilda Isroil davlati tashkil topgan paytda 700 000 ga yaqin falastinliklarning o‘z uylaridan ko‘chirilishini tasvirlash uchun arabcha “falokat” yoki “ofat” ma’nosini anglatuvchi so‘zni ishlatib.
“U yerda chodirlar, oddiy tibbiyot markazlari va maktablar bo‘ladi. Barchasi Isroil harbiylarining qattiq nazorati ostida turadi. Gumanitar yordam minimal miqdorda yetkazib beriladi. Taxminlarga ko‘ra, falastinliklar uchun u yerda yashash shunchalik og‘ir bo‘ladiki, ularning ko‘pchiligi ketishni xohlaydi”, degan nashr manbasi.
Ta’kidlanishicha, Isroil hujumining faollashuvi va falastinliklarni G‘azo janubiga ko‘chirish rejasi haqidagi xabarlar AQSH prezidenti Donald Trampning Saudiya Arabistoni, BAA va Qatarga tashrif buyuradigan Yaqin Sharqqa muhim safaridan bir haftadan sal oldinroq paydo bo‘lgan.
Yanvar oyida AQSH prezidenti Donald Tramp G‘azo aholisini uchinchi mamlakatlarga ko‘chirish va anklav o‘rnida kurort zonasi barpo etish niyatini bildirgan edi. Bu takliflarga ko‘ra, AQSH O‘rta Yer dengizining sharqiy sohilidagi hududlarni egallab olib, uni hashamatli plyaj kurortiga aylantirmasdan avval G‘azodagi falastinliklarni asosan Misr va Iordaniyaga ko‘chirish ko‘zda tutilgan.
Qohira va Ummon, shuningdek, dunyoning ko‘plab mamlakatlari va BMT agentliklari bu takliflarni qoraladi, ba’zilar bu rejani etnik tozalash deb atadi. Misr falastinliklarga nisbatan yangi adolatsizlikning bir qismi bo‘lmasligini ta’kidlab, G‘azo aholisini qabul qilish uning milliy xavfsizligiga putur yetkazishini aytdi.
Kutilayotgan operatsiya doirasida Isroil armiyasi (SAXAL) mintaqaning katta qismini o‘z nazoratiga olishi taxmin qilinmoqda. Ko‘plab binolarni buzish rejalashtirilgan. Bundan tashqari, HAMAS harakatlanish va qurol-yarog‘ kontrabandasi uchun foydalanadigan tunnellar tarmog‘ini yo‘q qilish mo‘ljallanmoqda. Yer osti inshootlarida 2023-yil 7-oktyabrdagi hujum paytida asirga olingan tirik isroillik garovlar ham bo‘lishi mumkin.
Ma’lum qilinishicha, 2023-yil oktyabrda Isroil va HAMAS o‘rtasidagi urush boshlanganidan buyon G‘azo sektorida 52 500 dan ortiq falastinlik halok bo‘lgan. Hududlarning aksariyati vayronaga aylanib, aholining ko‘pchiligi kamida bir marta ko‘chirishga majbur bo‘lgan.
“Gideon aravalari” operatsiyasi Donald Trampning Yaqin Sharqqa safari yakunlangach 15-maydan keyin boshlanishi kutilmoqda.
Izoh (0)